हामीसँग जोडिनुहोस

आजदेखि व्यक्तिगत घटना दर्ता सप्ताह शुरु

1 मिनेट

बैशाख १, काठमाण्डौ ।

आजदेखि व्यक्तिगत घटना दर्ता सप्ताह शुरु भएको छ । व्यक्तिगत घटना दर्ता सम्बन्धी सचेतना जगाउन सरकारले वैशाख महिनाको पहिलो हप्ता अभियानका रुपमा व्यक्तिगत घटना दर्ता सप्ताह मनाउने गरेको छ । राष्ट्रिय परिचयपत्र तथा पञ्जीकरण विभागको अगुवाईमा आजदेखि ७ गते सम्म व्यक्तिगत घटना दर्ता सप्ताह मनाईंदैछ ।

व्यक्तिका व्यक्तिगत घटनाहरु तोकिएको समय अर्थात घटना भएको ३५ दिनभित्र अनिवार्य रुपमा दर्ता गराउनुपर्छ भन्ने सन्देश आम नागरिकमा पुर्‍याउन सप्ताह मनाउन थालिएको हो ।

व्यक्तिगत घटना दर्ताको प्रमाणपत्र बालबालिकालाई विद्यालयमा भर्ना गर्न, नागरिकता र पासपोर्ट बनाउन, नाबालक परिचयपत्र बनाउन, बैंक खाता खोल्न, नाता कायम गर्न, जीवन बीमा गर्नका साथै विभिन्न सरकारी सेवा, सुविधा तथा हक स्थापना गर्न आवश्यक पर्छ ।

जुन बेलामा आफूलाई चाहिन्छ त्यही बेलामा घटना दर्ता गर्दा राज्यसँग अभिलेख नहुने र अभिलेखका अभावमा राज्यले दिने सेवा सुविधाको बाँडफाँड, बजेट विनियोजन, नीति निर्माणमा समस्या देखिने गरेको छ ।

व्यक्तिगत घटना दर्ताको महत्व सबैलाई बुझाउन ७५३ पालिकाका ६ हजार ६९१ वडा कार्यलयबाट काम भैरहेको विभागले जनाएको छ । विभागका अनुसार अहिले १५ देशका नेपाली नियोगबाट पनि घटना दर्ता हुने गरेको छ।

सरकारले सन् २०२४ को अन्त्य सम्ममा जन्म, मृत्यु, विवाह, बसाइँ सराइ, तथा सम्बन्ध विच्छेद लगायतका सबैखाले व्यक्तिगत घटना दर्ता गराउने लक्ष्य राखेकाले सबैलाई सबैखालका घटना दर्ता समयमै गराउन विभागले आग्रह गरेको छ ।

 

ट्रेण्डिङ

          अमृता अर्याल अस्मिता तामाङ
          रवि खड्का
          ©2024 Design and Developed By: Jamin Rai
          सम्पर्क
          ठेगाना सूर्यबिनायक–८, जगाती भक्तपुर, नेपाल
          यस वेवसाइटमा प्रकाशित कुनै पनि सामग्रीहरू पुनःप्रकाशन वा प्रसारण गर्नुअघि अनुमति लिनुहुन अनुरोध छ ।