1 मिनेट 
बंगलादेश, १६ बैशाख : मित्रराष्ट्र बंगलादेशको राजधानी ढाकामा जारी अन्तर्राष्ट्रिय भलिबल यू–१९ प्रतियोगितामा आयोजक बंगलादेश निलोलाई पछाडि पार्दै नेपाली टिम फाइनलमा प्रवेश गरेको छ ।
नेपाललाई पदक जिताउने लक्ष्यका साथ भक्तपुर जिल्ला खेलकुद विकास समितिका निवर्तमान् अध्यक्ष एवं टिम म्यानेजर दीपक थापाको नेतृत्वमा भक्तपुरबाट विदाई भई बंगदालेश गएको टिम आजको खेलमा फाइनल पुगेको हो ।
बंगलादेशमा आज भएको सेमीफाइनल खेलमा नेपाली टिमले बांगलादेश निलोलाई ३‐० को सेटमा २५–१६;२५–२१ र २५–२१ को सेटमा पराजित गर्दै फाइनलमा प्रवेश गरेको टिम म्यानेजर दीपक थापाले जानकारी दिनुभयो ।
टिम म्यानेजर थापाका अनुसार यसअघि हिजो भएको खेलमा नेपालीले माल्दिभ्सलाई २३–२५;२५–१९, २५–१३ र २५–२१ को ३‐१ को सेटमा पराजित गर्दै सेमिफाइनल प्रवेश गरेको थियो ।
भलिबल प्रतियोगितामा भाग लिन भक्तपुरबाट खेलाडीहरु सुरेश मल्ल, यज्ञराज जोशी, अविशेक थापा, पुष्कल थापा, दिपेन थापा, पहल गहतराज, राजकुमार रोकाया, सुनिल बोहोरा, इज्जत दनै, शसि पुलामी मगर र भुवन तामाङ्ग बंगलादेश प्रस्थान गरेका थिए ।
नेपालभरबाट छनोट भएकाले खेलाडीहरुलाई कुनैपनि सरकारी निकायको सहयोग नगरेपछि खेलाडीको मनोबल बढाउन र देशका लागि पदक जिताउन सहायता फाउण्डेसनका अध्यक्ष राजु ढुङ्गेल, विकास बस्नेत, व्यवसायी लक्ष्मण अवाल र थापा आफैले खेलाडीका लागि रकम जुटाएर बंगलादेश पठाएको थियो । प्रतियोगितामा सहभागि हुन टिम म्यानेजर थापासहित कोच उत्सव खड्का र सहायक कोच जनकबहादुर खड्का ढाका पुग्नु भएको छ ।
