1 मिनेट 
१६ साउन, काठमाडौं ।
नेपाल सरकारले आज १० अर्ब रुपैयाँ आन्तरिक ऋण संकलन गर्ने भएको छ । सार्वजनिक ऋण व्यवस्थापन कार्यालयले ११ वर्षे विकास ऋणपत्र–२०९२ जारी गरेसँगै उक्त कदम चालेको हो ।
जसका लागि सो कार्यालयले २०८१ साउन १६ गते एक सूचना निकाल्दै बोलकबोल मार्फत् विकास ऋणपत्र–२०९२ बिक्री खुला गरिएको बताएको छ । उक्त ऋणपत्र बैंक तथा वित्तीय संस्था, गैरबैंकिङ वित्तीय संस्था, बिमा कम्पनी, संगठित संस्था तथा नेपाली नागरिकले खरीद गर्न सक्ने सूचनामा उल्लेख छ ।
सार्वजनिक ऋण व्यवस्थापन कार्यालयले ऋणपत्र धितोमा राखी कर्जा लिन÷दिन पाइने पनि बताएको छ । यो ऋणपत्रको ब्याजदर बोलकबोलबाट तय हुने बताइएको छ ।
सरकारले लिएको यो ऋणको ब्याज अर्धवार्षिक रूपमा भुक्तानी गर्नेछ । सो ऋण यही साउन १७ गते लिनेछ भने २०९२ साल साउन १७ गते सावाँसहित भुक्तानी गर्नेछ ।
सार्वजनिक ऋण व्यवस्थापनअनुसार सरकारले उठाउने ऋण दिन ईच्छुक आवेकले आज बिहान १० बजेदेखि ३ बजेसम्म आवेदन दिइसक्नुपर्ने छ । ऋण खरीद गर्न चाहनेले उक्त समयभित्र कार्यालयको डीओएमएस प्रणालीको यूआरएलबाट बोलकबोल पेश गर्नुपर्ने हुन्छ ।
