1 मिनेट 
काठमाडौं,२४ भदौ ।
खाद्य व्यवस्था तथा व्यापार कम्पनी लिमिटेडले यस वर्षको दशैँको लागि १५ सय खसीबोका काठमाडौं उपत्यकामा ल्याउने भएको छ। खाद्य व्यवस्था तथा व्यापार कम्पनी लिमिटेडले यसका लागि आन्तरिक तयारी गरिसकेको जनाएको छ।
खाद्य व्यवस्था तथा व्यापार कम्पनीले दशैँ तिहारका लागि हरेक वर्षको दशैँमा खाद्य सामग्री तथा खसीबोका सहुलियतमा बेच्दै आइरहेको छ। खाद्य व्यवस्था तथा व्यापार कम्पनीका सूचना अधिकारी शर्मिला न्यौपाने सुवेदीका अनुसार यस वर्षको दशैँका लागि उपत्यकामा खसीबोका ल्याउन तयारी भइसकेको छ।
कम्पनीले हेटौँडा,धादिङ,दाङलगायत जिल्लाबाट खसीबोका ल्याउनेछ। कम्पनीले गत दशैँमा करिब दुई हजार खसीबोका ल्याएको थियो तर अपेक्षित बिक्री हुन सकेन। त्यसपछि यस वर्ष कम्पनीले १५ सय मात्रै खसीबोका ल्याउन लागेको हो।
३ सय च्याङ्ग्रा ल्याइने
कम्पनीले यस वर्ष ३ सयवटा मात्रै च्याङ्ग्रा ल्याउने भएको छ। गत दशैँमा खाद्यले ५४२ वटा च्याङ्ग्रा ल्याएको थियो। तर खाद्य व्यवस्था तथा व्यापार कम्पनी लिमिटेडको प्रादेशिक कार्यालय थापाथलीमा राखिएको च्याङ्ग्रा छठसम्म ४७ वटा बिकेनन्। त्यहीँ राखेर दानापानी दिइँदै आएकोमा २०८० पुस १९ गते २० वटा च्याङ्ग्रा मरेको अवस्थामा भेटिए।
