2 मिनेट 
१० असोज,बुटवल ।
लुम्बिनी प्रदेशका पूर्वसामाजिक विकासमन्त्री एवं जनमत पार्टी प्रदेश सभा सदस्य चन्द्रकेश सीके गुप्ताविरुद्ध उनकै पत्नी कान्ति गुप्ताले हिंसा सम्बन्धी उजुरी दर्ता गराएकी छन् ।
राष्ट्रिय महिला आयोग र जिल्ला प्रशासन कार्यालय रुपन्देहीमा लुम्बिनी सांस्कृतिक नगरपालिका–७ निवासी गुप्ता र उनको परिवारका अन्य सदस्यविरुद्ध मानसिक र शारीरिक हिंसाको आरोप लगाउँदै कारबाहीको मागसहित उजुरी परेको हो ।६ वर्ष अगाडि नवलपरासीको प्रतापपुर गाउँपालिका–९ निवासी कान्ति कुमारी यादवसँग सीकेको विवाह भएको थियो । सीकेले पछिल्लो समय मानसिक यातना दिने र सासु–ससुराले शारीरिक यातना दिने गरेको भन्दै पीडित कान्तिले उजुरी दिएकी हुन् ।
गत वर्ष यस्तै उजुरी राष्ट्रिय महिला आयोगमा दिइएकोमा ‘अबदेखि यस्तो गल्ती नगर्ने’ भन्दै सीकेले लिखित प्रतिबद्धता जनाएका थिए । उनी रुपन्देहीको क्षेत्र नम्बर ५ ९२०बाट निर्वाचित प्रदेश सभा सदस्य हुन् ।
सीके गुप्ता र कान्तिबिच २०७५ साल वैशाख १४ गते हिन्दु धर्म अनुसार विवाह भएको हो । त्यो बेला सीकेले दाइजो नलिने बताएपछि उत्साहित बनेर कान्तिका बुवा प्रेमचन्द्र गुप्ताले हेलिकप्टर चार्टर गरेर लुम्बिनीबाट नवलपरासीसम्म सीकेलाई पुर्याएका थिए ।
सीके गुप्ता स्थानीय तहको निर्वाचन २०७९ मा जनमत पार्टीबाट लुम्बिनी सांस्कृतिक नगरपालिका मेयर पदमा उम्मेदवार बनेका थिए । तर उनी पराजित भए । प्रदेश सभा निर्वाचनमा उनी रुपन्देहीको क्षेत्र नम्बर ५ को ९२० बाट निर्वाचित भए । निर्वाचनको बेला धेरै रकम खर्च भएको भन्दै उनले ससुरालीतिर रकम ल्याउन अघोषित रूपमा दबाब दिन थालेको कान्तिको भनाइ छ ।
२०८० कार्तिकमा सीके गुप्ताको परिवारले कान्तिलाई कुटपिट गर्दै घर निकालाको प्रयास गरेको थियो । भागेर माइत गएपछि उनले राष्ट्रिय महिला आयोगमा उजुरी दिएकी थिइन् । त्यो बेला सीके गुप्ताले घरपरिवार र आफूबाट गल्ती भएको भन्दै अब यस्तो नगर्ने लिखित प्रतिबद्धता जनाएका थिए ।
त्यसपछि करिब ४ महिना घरपरिवार राम्रोसँग चले पनि पछिल्लो समय फेरि मानसिक यातना दिन सुरु भएको पीडितको भनाइ छ । गत असार १३ गते सीके घरमा नभएको बेलामा कान्तिलाई सासु, ससुरा, जेठानी मिलेर कुटपिट गरेको उजुरीमा उल्लेख छ ।त्यसपछि सीके गुप्ताले यहाँ घरपरिवार मिलाउन कठिन भयो, १०र१५ दिन माइत जाउ, पछि मिलेर भैरहवातिर र बसौँला भन्दै आफूलाई पठाएको कान्तिको भनाइ छ ।
त्यो बेला पीएसओ लगाएर माइत पठाएका सीकेले पछि आफ्नो मोबाइल नम्बर ब्लक गरेको र हालै अर्को नम्बरबाट सम्पर्क गर्दा डिभोर्स दिन्छु भन्दै धक्काएको कान्तिको आरोप छ ।
सीके र कान्तिका दुई छोराछोरी छन् । छोरी ४ वर्षको र छोरा १९ महिनाका छन् । कान्तिले आफूमाथि हिंसा गर्ने श्रीमान्, सासु ससुरा र नन्दलाई महिला हिंसा अन्तर्गत कारबाहीको माग गरेकी छन् ।इमेलबाट उजुरी परेपछि जिल्ला प्रशासन कार्यालय रुपन्देहीमा ३ घण्टासम्म प्रमुख जिल्ला अधिकारी गणेश अर्याल, रुपन्देहीका डीएसपी मनोहर भट्टलगायतको उपस्थितिमा छलफल भएको थियो ।
