1 मिनेट 
एमाले सांसद तथा सार्वजनिक लेखा समितिका सभापति ऋषिकेश पोखरेलका पूर्व स्वकीय सचिव अनिल पोखरेलले प्रहरी समक्ष आत्मसमर्पण गरेका छन्।
ठगी गरी आपराधिक लाभ लिएको आरोपमा पुस २२ गते पक्राउ पुर्जी जारी भएपछि पोखरेल फरार थिए।
आज बिहान आफैँ प्रहरीमा आत्मसमर्पण गर्न पुगेको जिल्ला प्रहरी कार्यालय मोरङका प्रवक्ता डीएसपी वेद जोशीले जानकारी दिए। उनलाई आजै अदालत लैजाने तयारी छ। एमाले मोरङका सदस्य समेत रहेका अनिलमाथि एमबिबिएस परीक्षामा पास गराइदिने भन्दै ठगी गरेको आरोप छ।
सप्तरीको अग्नीसाईर कृष्णासवरन गाउँपालिका–५ बकधुवाका बौवालाल चौधरीसँग उनले परीक्षामा नाम निकाल्न ३८ लाख ८० हजार रुपैयाँ लिएको जाहेरी परेपछि उनीविरुद्ध पक्राउ पुर्जी जारी भएको थियो।
सांसद पोखरेलले भने प्रश्न उठेपछि अनिललाई गत शुक्रबार स्वकीय सचिवबाट निलम्बन गरेका थिए। सहकारी ठगीमा पक्राउ पुर्जी जारी भइ फरार रहेकी पोखरेलपत्नी अञ्जला कोइराला भने हिजो अदालतमा उपस्थित भइ १० लाख धरौटी बुझाएर रिहा भइसकेकी छिन्।
