1 मिनेट 
काठमाडौं,२ माघ ।
प्रधानमन्त्री कप टी–२० महिला राष्ट्रिय क्रिकेट प्रतियोगितामा आज दुई वटा खेल हुँदैछन् । धनगढीको फाप्ला क्रिकेट मैदानमा हिजो शुरु भएको प्रतियोगिताको दोस्रो दिन आज पहिलो खेलमा बिहान ९ बजे सशस्त्र प्रहरीको एपीएफ र गण्डकी प्रदेशबीच खेल हुँदैछ । हिजोको खेलमा एपीएफले कर्णाली प्रदेशलाई एक सय ११ रनले हराएर विजयी शुरुवात गरेको थियो ।
त्यस्तै दिउँसो १ बजे हुने खेलमा लुम्बिनि र सुदूरपश्चिम प्रदेशले खेल्दैछन् । हिजोको उद्घाटन खेलमा सुदूरपश्चिमले गण्डकी प्रदेशलाई सात विकेटले हराएको थियो ।
प्रतियोगितामा सात वटा प्रदेश तथा दुई विभागीय टोली एपीएफ र आर्मी सहभागी छन् । सहभागी टोलीलाई दुई समूहमा विभाजन गरिएको छ । समूह ‘ए’ मा लुम्बिनी, गण्डकी, कर्णाली र सुदूरपश्चिम प्रदेशका साथै सशस्त्र प्रहरी बलको एपीएफ क्लब रहेका छन् । समूह ‘बी’ मा कोशी, बाग्मती र मधेश प्रदेशका साथै त्रिभुवन आर्मी क्लब रहेका छन् ।
राष्ट्रिय खेलकुद परिषद्को कार्ययोजना, नेपाल क्रिकेट सङ्घको आयोजना र सुदूरपश्चिम प्रादेशिक क्रिकेट सङ्घको व्यवस्थापनमा प्रतियोगिता गरिएको हो । प्रतियोगिता यही माघ १२ गतेसम्म चल्नेछ ।
प्रतियोगितामा पहिलो हुनेले पाँच लाख र दोस्रो हुने टोलीले तीन लाख रुपैयाँ पुरस्कार पाउने नेपाल क्रिकेट सङ्घका महिला विकास समितिले जनाएको छ ।
