1 मिनेट 
२७ फागुन,काठमाडौँ ।
ऊर्जा, जलस्रोत तथा सिँचाइमन्त्री दीपक खड्कासँग नेपालका लागि यूरोपेली यूनियन (ईयू)की स्थायी प्रतिनिधि भेरोनिक लोरेन्जोले शिष्टाचार भेट गरेकी छिन्।
सिंहदरबारस्थित ऊर्जा मन्त्रालयमा आज भएको भेटमा नेपालको ऊर्जा, जलस्रोत तथा सिँचाइ क्षेत्रमा ईयूले गरेको सहयोगका विविध विषयमा छलफल भयो। ईयूले सन् १९७४ मा कूटनीतिक सम्बन्ध स्थापना भएदेखि नेपालको दिगो विकासका लागि साझेदार निकायका रूपमा सहयोग गर्दै आएको छ। भेटमा ऊर्जामन्त्री खड्काले नेपालको ऊर्जा, जलस्रोत र पर्यटन क्षेत्रको विकासका ईयूले गरेको सहयोगप्रति धन्यवाद दिएको ऊर्जामन्त्री खड्काको सचिवालयले जनाएको छ।
उनले आगामी दिनमा स्वच्छ ऊर्जा, जलवायु परिवर्तन तथा आर्थिक स्थायित्वको क्षेत्रमा गरेको सहयोगप्रति आभार व्यक्त गरे। मन्त्री खड्काले सरकारले सन् २०३५ सम्म २८ हजार ५०० मेगावाट विद्युत् उत्पादन गर्ने लक्ष्य लिएकाले दातृ निकायको महत्त्वपूर्ण साथ र सहयोगको अपेक्षा गरे। उनले नवीकरणीय ऊर्जा तथा ऊर्जा दक्षता विधेयक संसद्मा पेश भइसकेकाले चाँडो पारित हुने बताए।
भेटमा लोरेन्जोले जलवायु परिवर्तन र वैकल्पिक ऊर्जाका क्षेत्रमा नेपालको विकासका लागि थप सहकार्य गर्न ईयू प्रतिबद्ध रहेको बताइन्। उनले नेपालले छिमेकी मुलुकसँग गरेको ऊर्जा सहकार्यको प्रशंसा समेत गरिन्। अपर अरुण, दूधकोशी जलाशययुक्त आयोजनालगायतमा ईयू लगानी गर्न इच्छुक रहेको स्थायी प्रतिनिधि लोरेन्जोको भनाइ थियो।
भेटमा ईयूको लगानीमा निर्मित चिलिमे–त्रिशूली प्रसारण लाइन उद्घाटन गर्ने सम्बन्धमा समेत छलफल भएको जनाइएको छ।
