1 मिनेट 
काठमाण्डौ,१८ चैत ।
बागमती प्रदेशसभाका सभामुख भुवनकुमार पाठकले आज बोलाएको सर्वदलीय बैठक भोलि विहान बस्ने भएको छ। आज अपराह्न ४ बजेपछि बस्नेगरी तय भएको सर्वदलीय बैठक भोलि विहान ८ बजेका लागि सारिएको हो।
प्रदेश मन्त्रिपरिषद्को बैठक आजै अपराह्न ४ बजे बस्ने र बैठकमा प्रमुख प्रतिपक्षी दल माओवादी केन्द्रका अध्यक्ष शालिकराम जम्कट्टेलसमेत उपस्थित हुन नसक्ने भएपछि सर्वदलीय बैठक भोलि विहानका लागि सारिएको सभामुख भुवनकुमार पाठकले जानकारी दिए।
सभामुख पाठकले पछिल्लो राजनीतिक घटनाक्रम र प्रदेशसभा सञ्चालनको विषयहरू टुङ्ग्याउन सर्वदलीय बैठक आह्वान गरेको जानकारी दिए। विगतका सहमति, पछिल्लो समय प्रदेश सरकारका कामकाज तथा हालै विकसित राजनीतिक घटनाक्रमका बारेमा छलफल गरेर अघि बढ्ने तयारी रहेको उनको भनाई छ।
बैठकले प्रदेशसभाको १९ चैतमा बस्ने बैठकका कार्यसूचीका विषयमा पनि निर्णय गर्ने जनाइएको छ।
