1 मिनेट 
काठमाडौं,२० चैत।
बागमती प्रदेशसभाको बैठक सभामुखले अर्को सूचना जारी नगरुन्जेलसम्म स्थगित भएको छ ।
बागमती सरकारले प्रदेशसभाको हिउँदे अधिवेशन अन्त्यको सिफारिसमेत गरेको छ।
बुधवार १ बजे बस्ने भनिएको प्रदेशसभाको बैठक सरकारले हिउँदे अधिवेशन अन्त्यका लागि सिफारिस गर्ने निर्णय गरेसँगै अनिश्चितकालका लागि स्थगित गरिएको हो। बागमती प्रदेशका सचिव पूर्णबहादुर दर्जीले बुधवार दिउँसो बस्ने भनिएको बैठक विशेष कारणले प्रदेशसभा नियमावली, २०७४ को नियम ६ को उपनियम २ बमोजिम सभामुखको अर्को सूचना नभएसम्मका लागि स्थगित गरिएको जानकारी दिए।
मंगलवार दिउँसो १ बजेका लागि बोलाइएको बैठक सत्तापक्ष र प्रतिपक्षबीच सहमति नहुँदा ४ बजेका लागि सारिएको थियो। ४ बजे पनि बैठक बस्ने वातावरण नबनेपछि सभामुखले बुधवार १ बजेका लागि बैठक आह्वान गरेका थिए।
मंगलवार विहानदेखि बसेको प्रदेशसभाका ७ दलको बैठकसमेत निष्कर्षविहीन बनेको थियो। प्रदेशसभाका सभामुख भुवनकुमार पाठकले आह्वान गरेको बैठकमा सत्तापक्ष र प्रतिपक्षबीचको विगतको बजेटमाथिको सहमति र पछिल्लो समय भएको सहकारीमन्त्री मदुकुमार श्रेष्ठको स्वकीय सचिवको आत्महत्या प्रकरणमा छानबिन समिति गठनबारे सहमति जुट्न नसक्दा बैठक सहमतिविहीन बनेको थियो।
सर्वदलीय बैठकमा सहमति भैसके पनि कार्य व्यवस्था परामर्श समितिको बैठकमा विपक्षी दलका केही सांसदहरुले असहमति जनाएपछि बैठक सरेको थियो।
