1 मिनेट 
२७ चैत ,काठमाडौं ।
गण्डकी प्रदेशसभाको सातौँ अधिवेशनले ६ वटा विधेयक पारित गरेर अन्त्य भएको छ।
माघ २१ गते शुरु भएको हिउँदे अधिवेशनमा १० वटा विधेयक विभिन्न समितिमा पठाइएको छ। हिउँदे अधिवेशनमा १६ दिनमा १६ वटा बैठक बसे।
मंगलवारको बैठकबाट प्रदेशसभा नियमावली संशोधन गरिएको छ भने समितिका सदस्यसमेत हेरफेरसमेत भएका छन्। प्रदेशसभा सचिवालयका उपसचिव प्रेम सुवेदीले १६ दिन गरी २७ घन्टा ५३ मिनेट बैठक बसेको बताए। मंगलवार रातिदेखि अधिवशेन सकिएको छ।
अधिवेशनले गण्डकी प्रदेशमा साझेदारी फर्मको नियमन र व्यवस्थापन गर्न बनेको विधेयक, गण्डकी प्रदेशमा सार्वजनिक सडक निर्माण, विस्तार तथा मर्मतसम्भार गर्नेसम्बन्धी विधेयक, सामयिक कर असुल गर्ने सम्बन्धमा व्यवस्था गर्न बनेको विधेयक पारित गरेको छ।
प्रदेशसभाबाट गण्डकी प्रदेश निजामती सेवा ऐन २०७९ लाई संसोधन गर्न बनेको विधेयक र जीवनाशक विषादी व्यवस्थान सम्बन्धमा व्यवस्था गर्न बनेको विधेयक पनि पारित भए।
यस अवधिमा गण्डकी प्रदेश औद्योगिक व्यवसाय ऐन २०७५ लाई संशोधन गर्न बनेको विधेयक, गण्डकी प्रदेशमा विद्युत विकास सम्बन्धमा व्यवस्था गर्न बनेको विधेयक, गण्डकी प्रदेशमा मगर र गुरुङ भाषालाई सरकारी कामकाजको भाषाको रुपमा प्रयोग गर्ने सम्बन्धमा व्यवस्था गर्न बनेका विधेयक प्रदेश सभामा पेश भएका छन्।
गण्डकी प्रदेशका दलित अधिकार तथा सशक्तीकरण, अपांगता भएका व्यक्तिहरुको अधिकार, खानी तथा खनिज सम्बन्धमा व्यवस्था गर्न बनेको विधेयक दर्ता भएका छन्।
