1 मिनेट 
५ वैशाख,काठमाडौं ।
मकवानपुरमा सवारी दुर्घटनामा हुँदा दुई जनाको मृत्यु भएको छ । १४ जना घाइते भएका छन् ।
दुर्घटनामा गम्भीर घाइते भएकी रौतहटकी ५० वर्षीया नीलमदेवी राउतको उपचारको क्रममा आज बिहान हेटौंडा अस्पतालमा मृत्यु भएको जिल्ला प्रहरी कार्यालय मकवानपुरले जनाएको छ ।
प्रहरीका अनुसार सर्लाहीकी १३ वर्षीया मानुसी मगरको शव आज बिहान घटनास्थल नजिकैको खोल्सामा फेला परेको छ ।
दुर्घटनामा घाइते भएका १० जनाको हेटौँडा अस्पताल र अन्यको मकवानपुर सहकारी अस्पतालमा उपचार भइरहेको छ । गएराति १ बजे मकवानपुरगढी गाउँपालिका–२ धरमपानीस्थित कान्तिलोकपथ सडकखण्डमा काठमाडौंबाट हेटौंडातर्फ जाँदै गरेको यात्रुवाहक बस दुर्घटना हुँदा दुईजनाको मृत्यु भएको हो ।
बा प्र ०१–००६ ख ७०७२ नम्बरको गाडी सडकबाट करिब २०० मिटर तल खसेर दुर्घटना भएको प्रहरीले बताएको छ ।
गाडीमा चालकसहित १६ जना सवार थिए ।
