1 मिनेट 
चाँगुनारायण (ताथली), २८ साउन । चाँगुनारायण नगरपालिका–९ ताथलीस्थित राम सीता मन्दिरसंगैको सडकमा दोहोरो यातायातको साधान सञ्चालन हुने गरि मर्मत कार्य सुरु भएको छ ।
चाँगुनारायण नगरपालिकाका उपप्रमुख रमेश बुढाथोकीले मंगलबार उक्त सडक मै पुगेर सडकको अनुगमन समेत गरि स्थानीयसंग छलफल गरेर सडक निर्माणको जिम्मेवारी दिनु भएको थियो ।
उपप्रमुख बुढाथोकीले भन्नुभयो, “स्थानीले सडकमै केराको बोट रोपेर छिटो सडक निर्माण गर्न सांकेतिक रुपमा बिरोध गरेको जानकारी पाए, म सोही स्थानमा गएर हेरे, स्थानीयसंग बसेर छलफल गरेँ । स्थानीयलाई नै सडक एक साताभित्र ग्राईबेल गर्ने र मर्मत सम्पन्न गर्र्दै दुईतर्फी यातायात सञ्चालन गर्ने गरि तयार पार्न जिम्मेवारी दिएको छु, आजैदेखि सडकमा ग्राइबेल हाल्ने र सडक मर्मतको काम सुरु भएको छ ।
नगरपालिकाको रु.२० लाखको लागतमा उपभोक्ता समिति मार्फत उक्त सडक खण्ड ढलान गर्न बजेट निकासा गरेपनि उपभोक्ता समितिले आधा काम मात्रै गरेको थियो ।
त्यस पश्चात एकतर्फी रुपमा मात्र सञ्चालन भएपछि सडकमा सवारी चाप बढेर जाम हुने तथा जोखिम बढेपछि स्थानीय दक्षिणकाली युवा समूहले सडक छिटो बनाउनु पर्ने माग गरेको थियो । स्थानीयले सडकमै केराको बोट समेत रोपेका थिए ।
उक्त सडक अब एक साता भित्र दुईतर्फी यातायात सञ्चालन हुने गरि मर्मत गर्ने जिम्मेवारी दिएर तत्काल काम सुरु गर्न निर्देशन दिएको उपप्रमुख बुढाथोकीले जानकारी दिनुभयो ।
