1 मिनेट 
काठमाडौं– कोरियाली अन्तर्राष्ट्रिय सहयोग नियोग ले दक्षिण कोरियाबाट फर्किएका नेपाली आप्रवासी कामदारहरूको पुनःएकीकरणमा सघाउन २५ लाख अमेरिकी डलर बराबरको वित्तीय सहायता उपलब्ध गराउने भएको छ।
कोइकाले जारी गरेको विज्ञप्तिअनुसार उक्त रकम पुनःएकीकरणका लागि चरणगत सहयोग प्रणाली सुदृढीकरण परियोजना कार्यान्वयनमा खर्च गरिनेछ। यस परियोजनाले विदेशबाट फर्किएका कामदारहरूलाई आर्थिक रूपमा स्थिर बनाउन र उनीहरूलाई उद्यमशीलतामा जोड्न सहयोग गर्ने लक्ष्य राखेको छ।
विशेषगरी दक्षिण कोरिया बाट फर्किएका नेपालीहरूले त्यहाँ आर्जन गरेको सीप, अनुभव र सीपमूलक दक्षतालाई उपयोग गरी स्थानीय स्तरमा आर्थिक गतिविधि विस्तार गर्ने र आत्मनिर्भर बन्न सहयोग पुर्याउने परियोजनाको उद्देश्य रहेको छ।
यस कार्यक्रमले फर्किएका आप्रवासीहरूलाई रोजगारी सिर्जना, उद्यम विकास र स्थानीय आर्थिक वृद्धिमा योगदान गर्न प्रेरित गर्ने अपेक्षा गरिएको छ।
