1 मिनेट 
काठमाडौँ– नेपाल धितोपत्र बोर्ड ले व्यवसायी दिपक भट्ट संलग्न धितोपत्र कारोबारमा गम्भीर अनियमितता भएको निष्कर्षसहित प्रारम्भिक जाँचबुझ प्रतिवेदन तयार गरेको छ।
सम्पत्ति शुद्धीकरण अनुसन्धान विभाग को पत्राचारपछि सुरु गरिएको अनुसन्धानमा भट्टले धितोपत्र ऐनविपरीत कृत्रिम कारोबारमार्फत बजार प्रभावित पारेको ठहर गरिएको छ।
प्रतिवेदनअनुसार भट्टले वास्तविक लेनदेनबिना उधारोमा सेयर कारोबार गरी कृत्रिम रूपमा मूल्य वृद्धि गराएका थिए। साथै, आफ्नै तथा पारिवारिक स्वामित्वमा रहेका हिमालयन रिइन्स्योरेन्स, गार्डियन माइक्रो लाइफ र नेपाल माइक्रो इन्स्योरेन्स बीच आपसी खरिद–बिक्री गरेर सेयर मूल्यमा उतारचढाव ल्याइएको उल्लेख छ।
यस प्रकरणमा भट्टलाई मुख्य आरोपित बनाइएको छ भने शुभी अग्रवाल, ऋषिराज मोर र राजबहादुर शाह लाई मतियारका रूपमा समेटिएको छ। साथै शेखर गोल्छा र रोहित गुप्ता लगायतका व्यक्ति तथा संस्थाहरूलाई पनि सहयोग गरेको आरोप लगाइएको छ।
बोर्डले यो कार्य धितोपत्र सम्बन्धी ऐन, २०६३ को दफा ९४, ९५ र ९६ बमोजिम कसुर हुने ठहर गर्दै थप अनुसन्धान तथा कारबाही अघि बढाउन सिफारिस गरेको जनाएको छ।
