1 मिनेट 
भक्तपुर– केही दिनयता परेको अविरल वर्षासँगै आएको बाढी तथा पहिरोका कारण अवरुद्ध भएका देशका विभिन्न राजमार्गमध्ये केही सडकखण्डमा पुनः यातायात सञ्चालनमा आएको छ।
सोमबार साँझको वर्षापछि गएको पहिरोका कारण अवरुद्ध भएको ललितपुरको बागमती गाउँपालिका–३ भालुखोलास्थित कान्तिलोकपथ तथा ताप्लेजुङको मेरिङदेन गाउँपालिका–५ हाङगाङदाङ थुकिम्बा–दोभान भित्री सडकखण्ड सञ्चालनमा आएका छन्।
त्यसैगरी, सिन्धुपाल्चोकको भोटेकोशी गाउँपालिका–२ कोदारीस्थित ईकु पहिरोका कारण अवरुद्ध अरनिको राजमार्ग तथा मकवानपुरको भिमफेदी गाउँपालिका–८ भर्याङडाँडास्थित कान्तिलोकपथमा पनि यातायात सञ्चालन सुरु भएको केन्द्रीय प्रहरी प्रवक्ता एवं प्रहरी नायब महानिरीक्षक अविनारायण काफ्लेले जानकारी दिए।
उनका अनुसार भोजपुर नगरपालिका बोखिमस्थित मध्यपहाडी लोकमार्ग तथा म्याग्दीको अन्नपूर्ण गाउँपालिका–३ जलथलेस्थित बेनी–जोमसोम सडकखण्ड एकतर्फी रूपमा सञ्चालनमा रहेका छन्।
यता, इलामको रोङ गाउँपालिका–६ सलकपुर डखेप हुँदै झापा जोड्ने भित्री कच्ची सडक, काभ्रेपलाञ्चोकको नमोबुद्ध नगरपालिका–६ चौकीडाँडा र रोशी गाउँपालिका–७ घुमाउने ४०० बेँसीस्थित बीपी राजमार्ग तथा लमजुङको मध्यनेपाल नगरपालिका–१० बिमिरेभञ्ज्याङस्थित मध्यपहाडी लोकमार्ग भने पूर्ण रूपमा अवरुद्ध रहेको प्रहरीले जनाएको छ।
यसैबीच, काभ्रेपलाञ्चोकको खुर्कोट–नेपालथोक–कटुञ्जेबेसी खण्डमा सबै प्रकारका सवारीसाधन सञ्चालनमा रोक लगाइएको छ।
वर्षायाममा बाढी र पहिरोको जोखिम उच्च हुने भएकाले अवरुद्ध तथा एकतर्फी सञ्चालनमा रहेका सडकखण्डमा यात्रा गर्दा विशेष सावधानी अपनाउन प्रहरीले आग्रह गरेको छ।
