2 मिनेट 
भक्तपुर– लामो समयदेखि स्थानीयको असन्तुष्टिका कारण रोकिँदै आएको Nepal Electricity Authority को ‘हेटौँडा–ढल्केवर–दुहवी ४०० केभी प्रसारण लाइन’ निर्माण पुनः सुरु भएको छ ।
सरकारको पहलपछि प्रसारण लाइन निर्माणले पुनः गति लिएको हो । मुआब्जा र जग्गा विवादका कारण अवरुद्ध आयोजना ऊर्जा, जलस्रोत तथा सिँचाइमन्त्री Biraj Bhakta Shrestha को पहलपछि सक्रिय रूपमा अगाडि बढाइएको जनाइएको छ ।
Nepal Electricity Authority ले प्रभावित स्थानीय, जनप्रतिनिधि तथा सरोकारवालासँग मन्त्री श्रेष्ठले गरेको निरन्तर छलफल र समन्वयपछि जग्गाधनीले मुआब्जा स्वीकार गरेकाले टावर निर्माण पुनः सुरु भएको जानकारी दिएको छ ।
सन् २०१२ देखि निर्माण सुरु भएको प्रसारण लाइनअन्तर्गत हेटौँडाको हटिया क्षेत्रमा टावर निर्माण रोकिँदा आयोजना वर्षौंदेखि प्रभावित बनेको थियो । कुल २८८ किलोमिटर लम्बाइको आयोजनामध्ये पूर्वी खण्ड १५४ किलोमिटर लामो ढल्केवर–इनरुवा खण्ड तीन वर्षअघि नै सञ्चालनमा आइसकेको छ । तर, १३४ किलोमिटर लामो हेटौँडा–ढल्केवर खण्ड भने मुआब्जा विवादका कारण ढिलाइ भइरहेको थियो ।
प्राधिकरणका अनुसार हेटौँडा क्षेत्रमा निर्माण गर्नुपर्ने १४ वटा टावरमध्ये हाल तीन वटाको निर्माण सम्पन्न भइसकेको छ भने दुई वटाको इरेक्सन (टावर ठड्याउने) कार्य जारी छ । सबै टावरको जग निर्माण पूरा भइसकेको र बाँकी संरचनाको काम अन्तिम चरणमा पुगेको जनाइएको छ ।
Dirghayu Kumar Shrestha ले टावर निर्माणसँगै मुआब्जा तथा क्षतिपूर्ति वितरणको प्रक्रिया समानान्तर रूपमा अघि बढाइएको जानकारी दिए । उनले कानुनअनुसार प्रभावितलाई उचित क्षतिपूर्ति उपलब्ध गराइने प्रतिबद्धता व्यक्त गर्दै तार तान्ने कार्य सुरु भएपछि पहिचान भएका सबैलाई एकैपटक मुआब्जा वितरण गरिने बताए ।
उनका अनुसार चालु आर्थिक वर्षभित्र प्रसारण लाइन सञ्चालनमा नआए वर्षायाममा उत्पादन हुने करिब ८०० मेगावाट विद्युत् प्रवाह हुन नसकी खेर जाने जोखिम रहन्छ । त्यसबाट राष्ट्रलाई ठूलो आर्थिक क्षति हुनसक्ने उनको भनाइ छ ।
प्राधिकरणले वन क्षेत्रको रुख कटान तथा जग्गा प्रयोगसम्बन्धी बाँकी स्वीकृति प्राप्त हुनेबित्तिकै बाँकी दुई वटा टावर निर्माण सम्पन्न गर्ने लक्ष्य राखेको छ ।
आयोजना सम्पन्न भएपछि देशको आन्तरिक विद्युत् आपूर्ति थप सुदृढ हुने, राष्ट्रिय ग्रिडको विश्वसनीयता बढ्ने तथा छिमेकी मुलुकसँगको विद्युत् व्यापार विस्तारमा महत्वपूर्ण योगदान पुग्ने अपेक्षा गरिएको छ ।
यसअघि पटकपटक प्रयास भए पनि समस्या समाधान हुन सकेको थिएन । पछिल्लो पहलपछि अब प्रसारण लाइन निर्माण सम्पन्न हुने विश्वास गरिएको छ ।
