1 मिनेट 
काठमाडौँ– महानगर यातायात प्रालिले आफ्नो सार्वजनिक यातायात सेवामा थप १६ वटा विद्युतीय बस सञ्चालनमा ल्याएको छ।
बुधबार काठमाडौँमा आयोजित कार्यक्रममा शशिला मोटर्स प्रालिले महानगर यातायात प्रालिलाई नयाँ विद्युतीय बस हस्तान्तरण गरेको हो। ३३ सिट क्षमताका यी बसहरू यात्रुहरूको सहज यात्रालाई ध्यानमा राखेर आधुनिक डिजाइनमा तयार गरिएको बताइएको छ।
चीनबाट आयात गरिएका बसमा १४४ किलोवाट क्षमताको सीएटीएल (CATL) ब्याट्री प्रयोग गरिएको छ। महानगर यातायातका अनुसार एकपटक पूर्ण चार्ज गर्दा बसले करिब २०० किलोमिटरसम्म यात्रा गर्न सक्छ।
नयाँ बसको सेवा शुभारम्भ कार्यक्रममा महानगर यातायात प्रालिका सचिव केशव नेपालले आगामी दिनमा विद्युतीय सवारी साधनको विकल्प अपरिहार्य बन्दै गएको उल्लेख गर्दै कम्पनीले विद्युतीय सेवा थप विस्तार गर्दै लैजाने योजना रहेको जानकारी दिए।
महानगर यातायात प्रालिले हाल २८ वटा सिटी बस र २४ वटा माइक्रोबस गरी कुल ५२ वटा विद्युतीय सवारीसाधन सञ्चालन गरिरहेको जनाएको छ। थप १६ बस सञ्चालनमा आएपछि कम्पनीको विद्युतीय सार्वजनिक यातायात सेवा अझ सशक्त हुने विश्वास गरिएको छ।
प्रकाशित मिति : २० जेठ २०८३, बुधबार
