1 मिनेट 
भक्तपुर– नेपाल–भारत सीमासम्बन्धी विषयमा प्रधानमन्त्रीले दिएको अभिव्यक्ति फिर्ता लिन माग गर्दै सांसदहरूले विरोध जनाएपछि राष्ट्रियसभाको बैठक जेठ २६ गतेसम्मका लागि स्थगित गरिएको छ।
बुधबार राष्ट्रियसभा बैठक सुरु हुनेबित्तिकै विपक्षी सांसदहरूले प्रधानमन्त्रीले आफ्नो अभिव्यक्ति नसच्याएसम्म बैठकको कारबाही अघि बढ्न नदिने अडानसहित विरोध जनाएका थिए। लगातारको अवरोधका कारण बैठक एक सातापछि बस्ने गरी स्थगित गरिएको हो।
बैठकमा राष्ट्रियसभा सदस्य सुनिल बहादुर थापा ले प्रधानमन्त्रीको अभिव्यक्ति गैरजिम्मेवार र तथ्यहीन भएको आरोप लगाउँदै उक्त अभिव्यक्ति फिर्ता लिन तथा माफी माग्नुपर्ने बताए। उनले प्रधानमन्त्रीको भनाइ अपरिपक्व रहेको टिप्पणी गर्दै यसले छिमेकी राष्ट्रसँगको सम्बन्धमा समेत नकारात्मक असर पार्न सक्ने धारणा राखे।
सदस्य थापाले प्रधानमन्त्रीसँग सीमा मिचिएको सम्बन्धी कुनै तथ्य वा प्रमाण भए संसद्मा प्रस्तुत गर्न पनि माग गरे।
बैठक सञ्चालनका क्रममा राष्ट्रियसभा अध्यक्ष नारायणप्रसाद दाहाल ले सांसदहरूलाई आसन ग्रहण गरी सदनको कारबाही सञ्चालन गर्न आग्रह गरेका थिए। तर विरोध कायम रहेपछि उनले बैठक जेठ २६ गतेसम्मका लागि स्थगित गरेका हुन्।
प्रधानमन्त्रीको अभिव्यक्तिप्रति असन्तुष्टि जनाउँदै सांसदहरूले निरन्तर विरोध जनाएपछि पछिल्ला केही दिनदेखि राष्ट्रियसभाको बैठक प्रभावित हुँदै आएको छ।
