झापामा सवारी दुर्घटनाको मुख्य कारण चालकको लापर्वाही, एक महिनामा ८ जनाको मृत्यु

झापा– झापामा पछिल्लो महिनामा भएका अधिकांश सवारी दुर्घटनामा मानवीय त्रुटि तथा चालकको लापर्वाही नै मुख्य कारक रहेको पाइएको छ।

जिल्ला प्रहरी कार्यालय झापाका सूचना अधिकारी एवं प्रहरी नायब उपरीक्षक रञ्जन अवाका अनुसार सडकको अवस्था वा सवारी साधनको प्राविधिक समस्याभन्दा चालकको असावधानीका कारण जिल्लाभर सडक दुर्घटनाको संख्या बढ्दै गएको हो।

प्रहरीले सार्वजनिक गरेको जेठ महिनाको मासिक प्रगति प्रतिवेदनअनुसार समीक्षा अवधिमा जिल्लाभर कुल १७४ वटा सडक दुर्घटना भएका छन्। तीमध्ये १५४ वटा दुर्घटना चालकको चरम लापर्वाहीका कारण भएको देखिएको छ।

प्रतिवेदनअनुसार सडकको खराब अवस्थाका कारण पाँच वटा र सवारीसाधनको यान्त्रिक गडबडीका कारण तीन वटा मात्रै दुर्घटना भएका छन्। त्यसबाहेक यात्रुको गल्तीका कारण आठ वटा, छाडा चौपायाका कारण एउटा तथा अन्य कारणले तीन वटा दुर्घटना भएको प्रहरीको तथ्यांकमा उल्लेख छ।

प्रहरी नायब उपरीक्षक अवाका अनुसार उक्त तथ्यांकले सडक पूर्वाधार वा प्रविधिगत समस्याभन्दा मानवीय त्रुटि नै दुर्घटनाको प्रमुख कारण रहेको स्पष्ट पार्छ।

यस अवधिमा भएका दुर्घटनामा परी आठ जनाको मृत्यु भएको छ भने २८६ जना घाइते भएका छन्।

सडक सुरक्षालाई प्रभावकारी बनाउन झापा प्रहरी र ट्राफिक प्रहरीले संयुक्त रूपमा सञ्चालन गरेको सवारी जाँच अभियानअन्तर्गत नियमविपरीत सञ्चालन भएका दुई हजार ७३३ वटा सवारीसाधनलाई कारबाही गरिएको छ। उक्त कारबाहीबाट २८ लाख ३३ हजार ९१ रुपैयाँ राजस्व सङ्कलन भएको प्रहरीले जनाएको छ।

प्रकाशित मिति : ४ असार २०८३, बिहीबार