क्यान्सर उपचारका औषधिको अभाव हट्ने, केही दिनमै सहज उपलब्ध हुने

भक्तपुर– विगत दुई महिनादेखि अभाव हुँदै आएको क्यान्सर रोगको किमोथेरापी उपचारमा प्रयोग हुने औषधि अब केही दिनभित्र सहज रूपमा उपलब्ध हुने भएको छ।

औषधि व्यवस्था विभागका सूचना अधिकारी किरणसुन्दर बज्राचार्यका अनुसार ‘कार्बोप्लाटिन’ र ‘सिस्प्लाटिन’ लगायत क्यान्सर उपचारका अत्यावश्यक औषधिको आपूर्ति सहज बनाउन आवश्यक प्रक्रिया अघि बढाइएको छ।

“औषधिको अभावका कारण बिरामीलाई सहज होस् भनेर देशका केही अस्पताल र फार्मेसीलाई सम्पर्क केन्द्रका रूपमा तोकेर वितरण गर्दै आएका थियौँ,” बज्राचार्यले भने, “अब आयात प्रक्रिया सहज बनाएर बिरामीले सजिलै औषधि पाउने व्यवस्था मिलाइनेछ।”

उनका अनुसार सरकारले ती औषधिको मूल्य समायोजन गर्ने प्रतिबद्धता जनाइसकेको छ। मूल्य समायोजनपछि आयात र आपूर्ति प्रक्रिया थप सहज हुने अपेक्षा गरिएको छ।

विभागका अनुसार हाल ‘कार्बोप्लाटिन’ करिब दुई हजार भाइल र ‘सिस्प्लाटिन’ ५० भाइल मात्र मौज्दात छ। नेपालमा मासिक रूपमा करिब एक हजार भाइल ‘कार्बोप्लाटिन’ र ६०० भाइल ‘सिस्प्लाटिन’ आवश्यक पर्ने अनुमान गरिएको छ।

औषधिको अभावका कारण विभागले बिरामीलाई औषधि उपलब्ध गराउन विभिन्न अस्पताल र फार्मेसीलाई सम्पर्क केन्द्र तोकेको छ। तीमध्ये BPKMCH, Bir Hospital, Tribhuvan University Teaching Hospital, Patan Hospital लगायतका स्वास्थ्य संस्थामा पनि किमोथेरापीका औषधिको अभाव देखिएको थियो।

नेपाल औषधि आपूर्तिकर्ता सङ्घका अध्यक्ष पवन आचार्यले बिरामीको उपचार प्रभावित हुन नदिन महँगो मूल्यमा भए पनि आवश्यक औषधि आयात गरेर उपलब्ध गराइरहेको बताए। उनका अनुसार एक महिनालाई पुग्ने ‘सिस्प्लाटिन’ औषधि भारतबाट नेपाल आउने क्रममा छ।

सरकारले मूल्य समायोजनको निर्णय कार्यान्वयन गरेपछि क्यान्सर उपचारमा आवश्यक औषधिको अभाव अन्त्य हुने विश्वास सरोकारवालाहरूले व्यक्त गरेका छन्।

प्रकाशित मिति : ६ असार २०८३, शनिबार