१० खेलाडीमा सीमित बेल्जियम इरानसँग गोलरहित बराबरीमा रोकियो, नकआउट यात्रा संकटमा

लस एन्जलस– उपाधि दाबेदार मानिएको बेल्जियम फिफा विश्वकपअन्तर्गत समूह ‘जी’ को खेलमा इरानसँग गोलरहित बराबरीमा रोकिएको छ। आइतबार राति लस एन्जलसमा भएको प्रतिस्पर्धामा १० खेलाडीमा सीमित बनेको बेल्जियमले अपेक्षाअनुसार प्रदर्शन गर्न नसक्दा लगातार दोस्रो पटक विश्वकपको समूह चरणबाटै बाहिरिने जोखिम बढेको छ।

केभिन डे ब्रुइना र रोमेलु लुकाकुजस्ता स्टार खेलाडी समेटिएको बेल्जियमले अधिकांश समय बल आफ्नो नियन्त्रणमा राखे पनि इरानको सुदृढ रक्षापंक्तिलाई भेद्न सकेन। उल्टै खेलका उत्कृष्ट अवसरहरू इरानले सिर्जना गरेको थियो।

पहिलो हाफमा इरानका स्ट्राइकर मेहदी तारेमीले फ्रिकिकमार्फत गोल गरेका थिए। तर भिडियो असिस्टेन्ट रेफ्री (VAR) ले अफसाइड ठहर गरेपछि गोलले मान्यता पाएन।

दोस्रो हाफमा बेल्जियमलाई ठूलो झट्का लाग्यो। डिफेन्डर नाथन एनगोयले खराब ब्याक-पास गरेपछि बल खोसेर अघि बढेका तारेमीलाई लडाएका कारण रेफ्रीले उनलाई सिधै रातो कार्ड देखाउँदै मैदानबाट बाहिर पठाए। त्यसपछि १० खेलाडीमा सीमित बेल्जियम रक्षात्मक बन्न बाध्य भयो।

खेल परिवर्तन गर्ने प्रयासस्वरूप बेल्जियमले दोस्रो हाफमा तीन खेलाडी परिवर्तन गरेको थियो। परिवर्तित खेलाडी म्याक्सिम डे कुइपरको शक्तिशाली प्रहार इरानी गोलरक्षकले उत्कृष्ट बचाउ गरे भने हान्स वानाकेनको प्रहार क्रसबारमाथिबाट बाहिरियो। अन्तिम समयसम्म दुवै टोलीले गोल गर्न नसकेपछि खेल गोलरहित बराबरीमा सकियो।

यो नतिजासँगै समूह ‘जी’ का हालसम्म भएका तीनै खेल बराबरीमा टुंगिएका छन्। दुई अंक जोडेको बेल्जियमले अब समूह चरणको अन्तिम खेलमा तुलनात्मक रूपमा कमजोर मानिएको न्युजिल्यान्डसँग प्रतिस्पर्धा गर्नेछ। यता, इरानले नकआउट चरणमा स्थान बनाउन आगामी शुक्रबार इजिप्टविरुद्ध कम्तीमा एक अंक आवश्यक पर्नेछ।

खेलसँगै मैदानबाहिर पनि इरानको राजनीतिक अवस्थाको प्रभाव देखियो। लस एन्जलसस्थित स्टेडियमबाहिर इरानी-अमेरिकी समुदायका प्रदर्शनकारीहरूले इरानको वर्तमान शासनविरुद्ध नाराबाजी गरेका थिए। रंगशालाभित्र इरानको राष्ट्रिय धुन बज्दा केही दर्शकबाट हुटिङ र सिठ्ठी सुनिए पनि इरानी खेलाडी मैदान प्रवेश गर्दा समर्थकहरूले उनीहरूलाई उत्साहजनक समर्थन गरेका थिए।