काठमाडौं, श्रावण ३० । निमोनियाका कारण गत साता ललितपुरको सुमेरु अस्पतालमा भर्ना भएका वरिष्ठ साहित्यकार मदनमणि दीक्षितको ९७ वर्षको उमेरमा आज निधन भएको छ । दीक्षितलाई बुधबार ‘डिस्चार्च’ गरी निवास कालिकास्थान ल्याइएको भएपनि आफ्नो निवासमा शौचालय जाँदा बेहोस हुनुभएका उहाँलाई कमलपोखरीस्थित हिमाल अस्पताल लगेपछि चिकित्सकले मृत घोषणा गरेका थिए । १९७९ फागुन ६ गते काठमाडौँको गैरीधारामा जन्मिनुभएको उहाँलाई मुटु, मिर्गौला र श्वासप्रश्वाससम्बन्धी समस्या थियो । उहाँले मदन पुरस्कार, साझा पुरस्कार, पद्मश्री पुरस्कारलगायत विभिन्न पुरस्कार र सम्मान पाएका थिए । नेपाली पत्रकारिता क्षेत्रमा पनि उनको विशिष्ट योगदान छ । उहाँको परिवारका अनुसार उहाँको अन्त्येष्टि आजै पशुपतीको आर्यघाटमा हुने छ ।