आर्थिक लेनदेनमा बलात्कारको मुद्दा मिलाउने १० जना पक्राउ

५ भाद्र २०७६, बाँके । आर्थिक लेनदेनमा बलात्कारको मुद्दा मिलाउन खोज्ने १० जनालाई प्रहरीले पक्राउ गरेको छ । पीडितपक्ष र फरार अभियुक्तसहित १० जनालाई प्रहरीले पक्राउ गरेको हो । ईलाका प्रहरी कार्यालय कोहलपुरबाट खटिएको प्रहरी टोलीले बलात्कार घटनाका अभियुक्तले आर्थिक लेनदेन गरी मुद्दा मिलाउन थालेको प्राप्त सूचनाका आधारमा पक्राउ गरेको जनाएको छ ।
कोहलपुर नगरपालिका–११ की ६ वर्र्षीया बालिकाको गत असार २१ गते बलात्कार भएको थियो । घटनाका अभियुक्तलाई प्रहरीले खोजी गरिरहेको अवस्थामा उनीहरुले पीडित पक्षसँग चार लाख रुपैयाँ लेनदेनमा मुद्दा मिलाउन खोजिरहेको अवस्थामा अभियुक्त र पीडित दुवै पक्षका १० जनालाई बुधबार पक्राउ गरेको इलाका प्रहरी कार्यालय कोहलपुरका प्रमुख प्रहरी नायब उपरीक्षक रमेशबहादुर सिंहले जानकारी दिनुभयो ।