1 मिनेट 
२४ भाद २०७६ । सुरक्षाको कारण देखाउँदै श्रीलंका क्रिकेट टिमका १० खेलाडीहरु पाकिस्तान जान इन्कार गरेका छन् । तीन वन–डे र तीन टी–२० खेलका लागि श्रीलंकाको टोली २७ सेप्टेम्बरमा पाकिस्तान जाने भनिएको थियो । श्रीलंकाले पाकिस्तानसँग दुई टेस्ट म्याच पनि खेल्ने भनिएको थियो । यद्यपि त्यसको मिति र स्थान सार्वजनिक भइसकेको थिएन । तर श्रीलंकाको टी–२० टिमका कप्तान लासिथ मालिंगा र वन–डे टिमका कप्तान डिमुथ करुणारत्ने सहितको टोलीका सदस्यले पाकिस्तान जान इन्कार गरेका हुन् ।
श्रीलंका क्रिकेट बोर्डले पाकिस्तान जाने कि नजाने भन्ने विषयमा आफ्ना खेलाडीहरुसँग छलफल आयोजना गरेको थियो । उक्त विषयमा निर्णय गर्न स्वयं खेलाडीहरुलाई नै भनिएको थियो । त्यसपछि पाकिस्तान भ्रमणमा जाने टोलीका कप्तान थिसरा परेरासहितका १० खेलाडीहरुले पाकिस्तान नजाने निर्णय लिएको श्रीलंका क्रिकेट बोर्डले जारी गरेको प्रेस विज्ञप्तिमा उल्लेख छ ।
