1 मिनेट 
काठमाडौँ, २१ चैत्र ।
नेकपा एमालेका वरिष्ठ उपाध्यक्ष ईश्वर पोखरेलले प्रधानमन्त्री शेरबहादुर देउवाले नेपालको चुच्चे नक्सालाई बुच्चे बनाएर भारतप्रति भक्तिभाव देखाएको आरोप लगाउनुभएको छ । प्रधानमन्त्री देउवाको भारत भ्रमणका क्रममा भारतको नयाँ दिल्लीस्थित नेपाली दूतावासमा बुच्चे नक्सा राखिएको भन्दै उहाँले प्रधानमन्त्रीको आलोचना गर्नुभएको छ ।
प्रधानमन्त्री देउवाको भारत भ्रमण उपलब्धि विहीन भएको उहाँले बताउनुभएको छ । प्रेस चौतारी नेपाल चितवन शाखाले आयोजना गरेको पत्रकार सम्मेलनमा पोखरेलले प्रधानमन्त्रीको भारत भ्रमणले केहि उपलब्धि हासिल नगरेको प्रतिक्रिया दिनुभएको छ ।
राष्ट्रिय अडानलाई पनि प्रधानमन्त्री देउवाले प्रतिनिधित्व नगरेको उहाँले बताउनुभएको छ । नेपाल र भारतको सहमतिमा गठन भएको इपिजी प्रतिवेदनको विषयमा मुख नखोलिएको उहाँले बताउनुभएको छ । फरक प्रसंगमा उहाँले विचार र कामको आधारमा निर्वाचन हुने भएकाले पाँच गठबन्धन आए पनि एमाले एक्लै काफी हुने उहाँले दाबी गर्नुभएको छ । सेटिङमा चलेको विषाक्त छालले निर्वाचन आयोगलाई पनि प्रभावित गर्न सक्ने भन्दै उहाँले संवेदनशिल विषयमा निर्णय गर्दा पनि आयोगले दलहरूसँग छलफल नै नगरेको बताउनुभएको छ ।
