2 मिनेट 
भक्तपुर, १४ भदौ : पहिरोको कारण दुर्घटनाको उच्च जोखिममा परेको भक्तपुरको पर्यटकीय क्षेत्र घ्याम्पेडाँडा रानीकोट हुदै पनौती जाने सडकको स्थानीय सरकारले मर्मत कार्य सुरु गरेको छ । सूर्यविनायक चोकबाट घ्याम्पेडाँडा, रानीकोट हुदैँ काभ्रेको पनौती जोडिने सडकमा पहिरो गएपछि यातायातको साधान आवतजावतमा समस्या पर्नुका साथै पहिरोको जोखिमले दुर्घटनाको जोखिम उच्च रहेको समाचार राससले १२ गते सम्प्रेषण गरेको थियो ।
सूर्यविनायक नगरपालिका वडा नं ८ को वडा कार्यालयले सडकको मर्मतका लागि डोजर पठाएर मर्मत कार्य सुरु गरेको वडाध्यक्ष पुष्पराज बस्नेतले जानकारी दिनुभयो । बस्नेतले घ्याम्पेडाँडा रानीकोट सडक पहिरोले समस्यामा पारेको जानकारी पाएपछि सडकको मर्मत कार्य गराएको बताउनुभयो ।
रानीकोटका पर्यटन व्यवसायी एवं भिलेज होटल हाइल्याण्ड रिसोर्टका सञ्चालक रामसुन्दर बकेँले भक्तपुरबाट पनौती जाने एक मात्र बैकल्पिक सडकको रुपमा रहेको घ्याम्पेडाँडा हुदै रानीकोट पनौती जाने छोटो दुरीको सडक वडा कार्यालयको नेतृत्वमा मर्मत कार्य सुरु भएको बताउनुभयो । वडाध्यक्ष बस्नेत आफैले सडकबारे चासो दिएर डोजर लगाएर सडक मर्मत एवं फराकिलो पार्ने कार्य भएको उहाँले बताउनुभयो ।
उहाँले भन्नुभयो, “सूर्यविनायकबाट काभ्रेको पनौती पुग्ने छाटो दुरीको यो एक मात्र सडक हो । यो सडक पर्यटकीय सडक पनि हो । सूर्यविनायकको पर्यटकीय क्षेत्रको रुपमा परिचित घ्याम्पेडाँडादेखि रानीकोटसम्ममा आन्तरिक र बाह्य पर्यटकको चाप बढिरहेको अबस्थमा एक महिनादेखि पटक पटक पहिरो गएको थियो । केहीदिन यता खानेपानीको मूल पाइप फुटेर पानी बगेपछि थप पहिरो गएर जोखिम बढेको थियो, नगरपालिकाले मर्मत सुरु गरेसंगै हामी पर्यटन व्यवसायी खुसी भएका छौँ ।”
पहिरो जान थालेपछि पनौतीबाट दूध, तरकारीलगायतका सामाग्री बोकेर सूर्यविनायक आउने जाने यातायातमा कमी आउनुका साथै घ्याम्पेडाँडा र रानीकोट जाने स्थानीयवासी एवं पर्यटकहरुलाई सास्ती भएको थियो । सडक मर्मतंगै अब सहज भएको उहाँले जानकारी दिनुभयो ।
पर्यटन व्यवसायी बकेँले भन्नुभयो, “रानीकोटमा आन्तरिक र बाह्य पर्यटकको राम्रो आगमन हुने गरेको छ । सडकका कारण पर्यटन व्यवसायमा समेत समस्या आएको हो । घ्याम्पेडाँडा माथि रानीकोटसम्म आएको पहिरो हरेक वर्ष म आफैले डोजर लगाएर पन्छाउने गर्थे । यसवर्ष पनि पन्छाउदै आएको थिए, अहिले धेरै नै ठूला पहिरो गएपछि वडा कार्यालयले मर्मत गरेकोमा हामी पर्यटन व्यवसायी उत्साहित छौँ ।”
