1 मिनेट 
भक्तपुर, १२ भदौ : भक्तपुरको पर्यटकीय क्षेत्र घ्याम्पेडाँडा रानीकोट सडक पहिलोका कारण दुर्घटनाको उच्च जोखिममा परेको छ ।
सूर्यविनायक चोकबाट घ्याम्पेडाँडा, रानीकोट हुदैँ काभ्रेको पनौती जोडिने सडकमा पहिरो गएपछि यातायातको साधान आवतजावतमा समस्या पर्नुका साथै पहिरोको जोखिमले दुर्घटनाको जोखिम उच्च भएको हो ।
रानीकोटका पर्यटन व्यवसायी एवं भिलेज होटल हाइल्याण्ड रिसोर्टका सञ्चालक रामसुन्दर बकेँले भक्तपुरबाट पनौती जाने एक मात्र बैकल्पिक सडकको रुपमा रहेको घ्याम्पेडाँडा हुदै रानीकोटबाट पनौती जाने छोटो दुरीको सडक पहिरोले उच्च जोखिममा पुगेको बताउनुभयो ।
उहाँले भन्नुभयो, “सूर्यविनायकबाट काभ्रेको पनौती पुग्ने छाटो दुरीको यो एक मात्र सडक हो । यो सडक पर्यटकीय सडक पनि हो । सूर्यविनायकको पर्यटकीय क्षेत्रको रुपमा परिचित रानीकोटमा आन्तरिक र बाह्य पर्यटकको चाप बढिरहेको अबस्थमा एक महिनादेखि पटक पटक पहिरो गएको छ । केहीदिन यता खानेपानीको मूल पाइप फुटेर पानी बगेपछि थप पहिरो गएर जोखिम बढेको छ, कुनै पनि बेला दुर्घटना होला भन्ने डर छ ।”
पहिरो जान थालेपछि पनौतीबाट दूध, तरकारीलगायतका सामाग्री बोकेर सूर्यविनायक आउने जाने यातायातमा कमी भएको छ भने घ्याम्पेडाँडा र रानीकोट जाने स्थानीयवासी एवं पर्यटकहरुलाई सास्ती भएको छ ।
पर्यटन व्यवसायी बकेँले भन्नुभयो, “रानीकोटमा आन्तरिक र बाह्य पर्यटकको राम्रो आगमन हुने गथ्र्यौ, सडकका कारण पर्यटन व्यवसायमा समेत समस्या आएको छ । घ्याम्पेडाँडा माथि रानीकोटसम्म आएको पहिरो हरेक वर्ष म आफैले डोजर लगाएर पन्छाउने गर्थे । यसवर्ष पनि पन्छाउदै आएको छु तर सूर्यविनायकबाट घ्याम्पेडाँडासम्मको सडक थप जोखिममा परेको छ ।”
उहाँले हरेक वर्ष घ्याम्पेडाँडा हुदै रानीकोट जाने सडकमा पहिरो जाने गरेपनि देशको तीनवटै सरकारले बेवास्ता गरेको गुनासो गर्नुभयो । हरेक दिन पनौतीबाट सूर्यविनायकसम्म सयौ सवारी साधान ओहोरदोहोर गर्ने यो सडक उच्च जोखिममा पर्दा पनि पहिरो नियन्त्रण र पन्छाउनेबारे कसैले चासो नदिएको यहाँका पर्यटन व्यवसायीहरुको गुनासो छ ।
घ्याम्पेडाडाका स्थानीय समिर लामाले यो सडकको अबस्था निकै नाजुक भएको, कालोपत्र उप्किएर खाल्डैखाल्डो भएको र साँघुरो सडक पहिरोको कारण स्थानीयले जोखिम मोलेर यात्रा गर्नु परेको गुनासो गर्नुभयो ।
