1 मिनेट 
काठमाडौँ, २४ मंसिर ।
आफ्नो समूहबाट सभापतिको साझा उम्मेदवार तय गर्ने क्रममा नेताहरुसँग भनाभनपछि महाधिवेशनको उद्घाटन मै सहभागी नहुने बताएका वरिष्ठ नेता रामचन्द्र पौडेल उद्घाटन सत्रमा उपस्थित हुने हुनुभएको छ । बुधबार बेलुका नेता प्रकाशमान सिंहको घरमा नेताहरु सिंह र शेखर कोइरालालाई सहमतिमा साझा उम्मेदवार छान्ने प्रस्तावमाथि छलफल गर्दा सहमति नजुटेपछि पौडेल आफु अब काँग्रेसको राजनीतिबाटै सन्यास लिने भनेर हिँड्नुभएको थियो । त्यसक्रममा उहाँले आफु महाधिवेशनमा समेत सहभागी नहुने बताउनुभएको थियो । त्यसको भोलिपल्ट बिहीबार दिनभर मोवाइल समेत डाइभर्ट गरेर कसैसँग सम्पर्कमा नआएका पौडेललाई आज शुक्रबार उद्घाटन हुने महाधिवेशनमा सहभागी हुन अर्का नेता विमलेन्द्र निधिले फोनमार्फत आग्रह गर्नुभएको थियो । निधीले पौडेललाई फोन गरेर महाधिवेशनमा सहभागी नहुँदा काँग्रेसमा राम्रो सन्देश नजाने भएकाले जसरी पनि सहभागी हुन आग्रह गर्नुभएको थियो ।
