1 मिनेट 
१६ वैशाख,काठमाडौं ।
नेपाल विद्युत् प्राधिकरणले आज सार्वजनिक गर्ने भनिएको श्वेतपत्र सार्वजनिक गर्न रोक लगाइएको छ । नेपाल विद्युत् प्राधिकरण सञ्चालक समितिले श्वेतपत्र सार्वजनिक गर्ने कार्य स्थगित गर्ने भनेपछि रोकिएको प्राधिकरणका प्रवक्ता राजभाई शिल्पकारले बताए ।
नेपाल विद्युत् प्राधिकरणका पूर्व प्रबन्ध निर्देशक कुलमान घिसिङलाई सरकारले पदबाट बर्खास्त गरेपछि नियुक्ति भएका प्रबन्ध निर्देशक हितेन्द्रदेव शाक्यले प्राधिकरणको श्वेतपत्र तयार गरेका थिए । प्राधिकरण तत्कालीन प्रबन्ध निर्देशक कुलमान घिसिङले भनेजस्तो नाफाको अवस्थामा नरहेर ठूलो दायित्वमा रहेको ऊर्जा, जलस्रोत तथा सिँचाइ मन्त्री र नवनियुक्ति प्रबन्ध निर्देशक शाक्यले समेत सार्वजनिक प्रतिक्रिया दिएका थिए ।
तर, शाक्यले तयार पारेको प्रतिवेदनलाई भने मन्त्री अध्यक्ष रहेको सञ्चालक समितिले नै सार्वजनिक गर्नबाट रोक लगाएको छ । किन रोक लगाएको भन्ने विषय भने प्राधिकरणले उल्लेख गरेको छैन ।
