राष्ट्रपतिसमक्ष विभिन्न ५ देशका राजदूतले गरे ओहोदाको प्रमाणपत्र पेश

काठमाडौँ,१८ वैशाख।

राष्ट्रपति रामचन्द्र पौडेलसमक्ष नेपालका लागि विभिन्न ५ देशका नवनियुक्त गैरआवासीय राजदूतहरूले आ–आफ्नो ओहोदाको प्रमाणपत्र पेश गरेका छन्।राष्ट्रपति भवनमा आज आयोजित छुट्टाछुट्टै विशेष समारोहमा गणतन्त्र बेलारूसका गैरआवासीय राजदूत मिखाइल कास्को, जर्जियाका गैरआवासीय राजदूत बख्ताङ, गणतन्त्र मालीका गैरआवासीय राजदूत ब्रिगेडियर जनरल फेलिक्स दिएल्लो, कुवेत अधिराज्यका गैरआवासीय राजदूत मेसल मुस्तफा जे अल्सेमाली र गणतन्त्र आर्मेनियाका गैरआवासीय राजदूत बहगन अफयानले आ–आफ्नो ओहोदाको प्रमाणपत्र पेश गरेका हुन्।

नवनियुक्त राजदूतलाई काठमाडौँस्थित होटल डुसिट प्रिन्सेसदेखि राष्ट्रपति भवनसम्म रिसल्लासहितको बग्गीमा सवार गराइएको थियो।

समारोहमा परराष्ट्र मन्त्री डा आरजु राणा देउवालगायत सरकारका उच्च पदस्थ अधिकारीसमेतको उपस्थिति रहेको थियो।