सुनसरी, २७ श्रावण । कोशी टप्पु वन्यजन्तु आरक्षको चरण क्षेत्रमा मरेका चौपायामा प्राणघातक रोग एन्थ्रेक्सको जिवाणु फेला परेको छ । आरक्षको घाँसे मैदानमा बिहीबार मरेका ४४ वटा चौपायाको रगतको नमुना परीक्षणका क्रममा एन्थ्रेक्सको जिवाणु भेटिएको हो । पशु रोग अन्वेषण प्रयोगशाला बिराटनगरका डाक्टर संजयकुमार यादवले आरक्ष क्षेत्रमा मरेका चौपायाको रगतको नमुना परीक्षणका क्रममा स्वाइल वर्न डिजिज अर्थात एन्थ्रेक्सको जिवाणुु फेला परेको जानकारी दिनुभयो ।
यो जिवाणु माटोमा रहने र घाँसको तल्लो भागसम्मै खाने पशुहरुमा सहजै रोग सर्ने गर्दछ । मरेका पशु छुँदा, स्वास लिँदा र जिवाणु रहेको स्थानको वरपर घाउचोट लागेका मानिस पुग्दा जिवाणु शरीरमा प्रवेश गर्न सक्ने सम्भावना रहने पशु चिकित्सकहरुले बतएकाच छन् । बिराटनगरमा रहेको ल्याबबाट परीक्षणका क्रममा एन्थ्रेक्स प्रमाणित भैसकेको बताउँदै डाक्टर यादवले त्यही अनुरुपको रिपोर्ट केन्द्रीय ल्याब काठमाण्डौंमा पठाइएको बताउनु भयो ।