सरकारले आदिवासीको हितमा महत्त्वपूर्ण काम गरेको छ :  प्रधानमन्त्री देउवा

काठमाडौं, २३ साउन ।
प्रधानमन्त्री एवं नेपाली कांग्रेसका सभापति शेरबहादुर देउवाले वर्तमान सरकारले आदिवासी, जनजातिको हितका लागि धेरै महत्त्वपूर्ण काम गर्दै आएको बताउनुभएको छ । २८ औं विश्व आदिवासी दिवसको अवसरमा सोमबार काठमाडौंमा आयोजित एक कार्यक्रमलाई सम्बोधन गर्दै प्रधानमन्त्री देउवाले संविधानमा उल्लेख भए अनुसार उनीहरूको हक, अधिकार र सुविधा दिलाउने कार्यमा पनि सरकार सधैँ क्रियाशील रहेको बताउनुभयो । आदिवासी, जनजातिहरूको पहिचान गर्ने र उनीहरूको भाषा, कला र संस्कृतिको संरक्षण र सम्वद्र्धन गर्नका लागि आफू नेतृत्वको विगतमा बनेको सरकारले नै आदिवासी, जनजाति उत्थान राष्ट्रिय प्रतिष्ठान स्थापना गरेको उहाँले स्मरण गराउनुभएको थियो । त्यस अवसरमा प्रधानमन्त्री देउवाले आदिवासी, जनजातिहरूलाई राज्यको कुनै पनि अवसरबाट बञ्चित हुन नदिन सम्बन्धित सबै पक्षले मिलेर काम गर्न आवश्यक रहेको पनि बताउनुभयो ।