1 मिनेट 
काठमाडौँ,फाल्गुन १८ ।
नेपाल निर्माण व्यवसायी महासंघको प्रतिनिधिमण्डलले प्रधानमन्त्री पुष्पकमल दाहालसँग भेटवार्ता गरेको छ । महासंघ अध्यक्ष रवि सिंह नेतृत्वको प्रतिनिधिमण्डलले निर्माण उद्योगको पछिल्लो समस्या र समाधानको उपायका बारेमा दाहाललाई जानकारी गराएको छ ।
भेटवार्ता क्रममा सिंहले बजेट सुनिश्चित नगरी आयोजनाहरू घोषणा गरिएका कारण व्यवसायीले ठूलो रकम भुक्तानी नपाएको गुनासो गर्नुभयो । रकम भुक्तानी नहुँदा निर्माण उद्योग असहज अवस्थामा रहेको बताउनुभयो । विना बजेटका नयाँ योजना घोषणा गर्नुभन्दा चालु अवस्थामा रहेका आयोजना सम्पन्न गर्ने कामलाई राज्यले प्राथमिकता दिनुपर्ने अध्यक्ष सिंहको भनाइ थियो ।
त्यस्तै आयोजनाहरू समयमै सम्पन्न नहुनुमा धेरै पक्ष जिम्मेवार हुँदाहुँदै एकोहोरो निर्माण व्यवसायीलाई मात्र दोषी देखाइएको अध्यक्ष सिंहले गुनासो गर्नुभयो । जवाफमा प्रधानमन्त्री दाहालले व्यवसायीको सुझावलाई आफूलाई महत्त्वका साथ लिने बताउनुभयो । । रकम निकासा नभएका सम्बन्धमा पनि बुझ्ने बताउनुभयो । निर्माण व्यवसायीको टोलीले फागुन २८ गते राजधानीमा हुने महासंघको २४ औं साधारण सभाको प्रमुख आतिथ्यता ग्रहण गरिदिन आग्रह गरेको छ ।
