1 मिनेट 
भक्तपुर, ३ साउन : काठमाडौंबाट भक्तपुर हुँदै काभ्रेतर्फ जादै गरेको बा.४ ख. ९३९६ नम्बरको यात्रुबाहक बस दुर्घटना हुँदा आठ जना घाइते भएका छन् ।
आज अपरान्ह साँगाको अग्लो कैलाशनाथ महादेव र भक्तपुरको साँगा सिमानामा गुडिरहेको बस खोचमा खसेर दुर्घटना भएपछि प्रहरीले उद्धार गरेको घट्नास्थलबाट जिल्ला प्रहरी परिसर भक्तपुरका प्रहरी उपरीक्षक प्रजित केसीले जानकारी दिनुभयो ।
बस सडकबाट तल खसेर दुर्घटना भएको बताउदै उहाँले तत्कालै प्रहरी पुगेर बसमा सवार घाइतेको उद्धार गरि भक्तपुर अस्पतालमा उपचार भइरहेको उहाँले जानकारी दिनुभयो । दुर्घटनामा घाइते भएकाहरु बस चालक जिल्ला सिन्धुली घ्याङलेख गा.पा–१ घर भई हाल काठमाण्डौं नयाँ बसपार्क बस्ने ३१ वर्षीय पुर्णबहादुर पाख्रिन, सुनसरी बराहक्षेत्र न.पा.–१ घर भई हाल काठमाण्डौं बसुन्धारा बस्ने ४४ वर्षीया रिता खत्री, काभ्रेपलान्चोक बनेपा न.पा.–७ बस्ने रितिका श्रेष्ठ रहेका छन् ।
त्यस्तै बनेपा न.पा.–१३ साँगा बस्ने ५९ वर्षीय अर्जुन खड्का, सिन्धुली घ्याङलेख गा.पा.–१ घर भई हाल सूर्यविनायक पाण्डुबजार बस्ने ३० वर्षीय सुर्यबहादुर पाख्रिन, सिन्धुपाल्चोक सुनकोशी गा.पा.–५ घर भई हाल काभ्रेपलान्चोक बनेपा बस्ने ३९ वर्षीय अमर लामा, काभ्रेपलान्चोक बनेपा न.पा.–३ बस्ने २२ वर्षीया सुस्मिता श्रेष्ठ घाइते भएका छन् ।
घाइतेहरुको भक्तपुर अस्पताल, मध्यपुर अस्पताल, डा.इवामुरा अस्पताल, शीर मेमोरियल अस्पतालमा उपचार भइरहेको प्रहरीले जानकारी दिएको छ ।
