1 मिनेट 
भक्तपुर, १३ बैशाख : मित्रराष्ट्र बंगलादेशको राजधानी ढाकामा हुने भलिबल प्रतियोगितामा सहभागी ११ जनाको खेलाडी तथा प्रशिक्षक टोली त्यसतर्फ प्रस्थान गरेको छ । ढाकामा यही १४ गतेदेखि हुन गईरहेको आमन्त्रित अन्तर्राष्ट्रिय भलिबल यू–१९ प्रतियोगितामा सहभागी हुने खेलाडी तथा अफिसरको भक्तपुरमा आयोजित कार्यक्रममा बिदाई गरि ढाका प्रस्थान गरेका हुन् ।
प्रतियोगितामा सहभागि हुन बंगलादेश जान राज्यतर्फले कुनै रकम उपलबध नगराएपछि जिल्ला खेलकुद बिकास समिति भक्तपुरका निवर्तमान् अध्यक्ष एवं टीम म्यानेजर दीपक थापाको नेतृत्वको टोलीले सहयोग रकम संकलन गरेको हो ।
खेलाडीहरु सुरेश मल्ल, यज्ञराज जोशी, अविशेक थापा, पुष्कल थापा, दिपेन थापा, पहल गहतराज, राजकुमार रोकाया, सुनिल बोहोरा, इज्जत दनै, शसि पुलामी मगर र भुवन तामाङ्ग बंगलादेश प्रस्थान गरेको टिम म्यानेजर समेत रहनु भएका थापाले बताउनुभयो ।
नेपालभरबाट छनोट भएकाले खेलाडीहरुलाई कुनैपनि सरकारी निकायको सहयोग नगरेपछि खेलाडीको मनोबल बढाउन र देशका लागि पदक जिताउन सहायता फाउण्डेसनका अध्यक्ष राजु ढुङ्गेल, व्यवसायी लक्ष्मण अवाल र थापा आफैले खेलाडीका लागि रकम जुटाएर बंगलादेश पठाएको हो । प्रतियोगितामा भाग लिन आजै टिम म्यानेजर थापासहित कोच उत्सव खड्का र सहायक कोच जनकबहादुर खड्का ढाका प्रस्थान गर्नुभएको छ ।
