2 मिनेट 
काठमाडौं । संसदका दुई ठूला दल एमाले र कांग्रेसले राष्ट्रिय सहमतिको सरकार बनाउने सहमति गरेका छन् । लामो गृहकार्यपछि दुई दलका शीर्ष नेता केपी शर्मा ओली र शेरबहादुर देउवाले नयाँ सरकार गठनका लागि मध्यराति सवा १२ बजे सहमतिपत्रमा हस्ताक्षर गरेका हुन् ।
संविधान संशोधनको एजेण्डासहित राष्ट्रिय सहमतिको सरकार बनाउने सहमतिपत्रमा हस्ताक्षर भएको बताइएको छ । कांग्रेसका एक नेताका अनुसार पहिलो चरणमा डेढ वर्ष एमालेका अध्यक्ष ओली प्रधानमन्त्री बन्नेछन् । दोस्रो चरणमापछि कांग्रेस सभापति देउवाले सरकारको नेतृत्व गर्नेछन् ।
सुरुमा नेतृत्व गर्ने एमालेले अर्थसहित ९ वटा मन्त्रालय र कांग्रेसले गृहसहित १० वटा मन्त्रालय लिने सहमति भइसकेको छ । त्यस्तै, प्रदेश सरकारमा पनि दुई दलबीच भागवण्डा भएको छ ।
दुई नेताबीच निर्वाचन प्रणालीलगायतका विषयमा संविधान संशोधन गर्न सुझाव आयोग बनाउने सहमति भएको छ ।
आयोगले दिने सुझावका आधारमा संविधान संशोधनमा जाने उनीहरूको तयारी छ ।
राष्ट्रिय सहमतिको सरकारका लागि माओवादी केन्द्र, रास्वपालाई पनि सरकारमा आउन अनुरोध गर्ने दुई नेताबीच सहमति भएको छ ।
त्यो सम्भव नभए संविधान संशोधनका लागि आवश्यक पर्ने दुई तिहाइका लागि अन्य साना दलको साथ खोज्ने बताइएको छ ।
एमालेले काग्रेससँग सहमतीय सरकारको सहमति गरेसँगै प्रधानमन्त्री पुष्पकमल दाहाल नेतृत्वको सरकार विघटनको डिलमा पुगेको छ ।
एमालेले सरकार छाडेर समर्थन फिर्ता लिएसँगै प्रचण्ड अल्पमतमा पर्नेछन् । एमालेका मन्त्रीहरुले आज राजीनामा बुझाउने बताइएको छ ।
यसैबिच नयाँ सरकार गठनबारे काँग्रेस र एमालेका नेताहरू मध्यरातमा राष्ट्रपति रामचन्द्र पौडेललाई भेट्न शीतल निवास पुगेका थिए ।
राष्ट्रपति पौडेलसँग नयाँ सरकार गठन प्रक्रियाको बारेमा छलफल भएको स्रोतले बतायो । माओवादी केन्द्रका अध्यक्ष पुष्पकमल दाहाल संविधानको धारा ७६ (२) अनुसार प्रधानमन्त्री नियुक्त भएका थिए ।
एमालेले प्रचण्डलाई दिएको विश्वास मत फिर्ता लिएपछि नयाँ सरकार गठनको प्रक्रिया सुरु हुनेछ । ओलीले सोही धारा अनुसार नै नया सरकार गठनको चाहाना राखेकाले एमाले र काँग्रेसबिच राष्ट्रपति पौडेललाई राखेर नै नयाँ सरकार गठनबारे छलफल भएको हो ।
राष्ट्रपतिबाट हुन सक्ने अवरोधको सम्भावना टरेपछि दुवै दल सहमति अनुसार अगाडि बढ्ने भएका हुन् । दुई तिहाइ पुरयाउन आउने पार्टीलाई पनि मन्त्रालय दिने गरी अध्यक्ष ओली र सभापति देउवाबिच समझदारी भएको छ ।
