काठमाडौं विश्वविद्यालयमा उड्डयन व्यवस्थापन पढाइ हुने

काभ्रे,२१ साउन ।

काभ्रेको बनेपामा उड्डयन व्यवस्थापन एभिएसन म्यानेजमेन्ट विषयमा पढाइ हुने भएको छ।

धुलिखेलस्थित काठमाडौं विश्वविद्यालय केयू स्कुल अफ म्यानेजमेन्टअन्तर्गत सिम्रिक भेञ्चर र सिद्धार्थ वनस्थली विद्यालयको साझदारीमा यहाँ स्नातक तहमा पढाइ हुने भएको हो।

भेञ्चरका अध्यक्ष रामेश्वर थापाका अनुसार चार वर्षे तहमा उड्डयन सञ्चालन, एयरलाइन्स र एयरपोर्टलाई प्रभावकारी रूपमा व्यवस्थापन गर्न ज्ञान र सीप प्रदान गरिने छ।

यस्तै चार वर्षे स्नातक कार्यक्रममा उड्डयन कानुन तथा नियम, उड्डयन सुरक्षा, एयरपोर्ट योजना तथा व्यवस्थापन, उड्डयन मार्केटिङ, एयरलाइन अपरेसन, उड्डयन र अर्थशास्त्र, पर्यटकीय महत्त्व र मानव संसाधन व्यवस्थानसहितका पाठ्यक्रम समावेश हुने जनाइएको छ। ‘

विद्यार्थीले जटिल परिस्थितिलाई कसरी व्यवस्थापन गर्ने तथा दबाबमा काम गर्ने तरिका र विभिन्न सरोकारवाला पक्षसँग प्रभावकारी रूपमा संवाद गर्ने विषयमा शिक्षण गराइनेछ

यो वर्ष ३३ विद्यार्थी भर्ना गर्ने केयूले बताएको छ।