यस वर्ष १५ दिन छिटो भित्रियो मनसुन

काठमाडौँ, १६ जेठ।

यस वर्षको मनसुन भित्रिएको छ । बिहीबार रातिदेखि नेपालको पूर्वबाट प्रवेश गरी कोशी प्रदेशका अधिकांश भू-भागमा मनसुन विस्तार भइसकेको मौसम पूर्वानुमान महाशाखाले जनाएको छ ।

जसकारण कोशी प्रदेशका अधिकांश मौसम केन्द्रहरुमा हल्कादेखि मध्यम मनसुनी वर्षा भएको अवस्था रहेको बताइएको छ ।नेपालमा मनसुन भित्रिने सरदर मिति जुन १३ हो । यस वर्षको मनसुन सरदर मितिभन्दा १५ दिन छिटो प्रवेश गरेको महाशाखाले जनाएको छ ।नेपालका अन्य भू-भागहरूमा मनसुनको प्रभाव विस्तार हुन अझै केही समयमा लाग्‍ने बताइएको छ । हाल देशको बाँकी भू-भागमा भने पश्चिमी वायू र स्थानीय वायूको प्रभाव यथावत रहेको महाशाखाले जनाएको छ ।