काठमाडौं,२७ श्रावण । – कृषि अनुसन्धान परिषदको काम कार्वाहीप्रति कृषि तथा पशुपंक्षी विकासमन्त्री चक्रपाणी खनालले असन्तुष्टि जनाएका छन् । किसानको पक्षमा कुनैपनि अनुसन्धानको काम गर्न नसकेको पाईएको भन्दै मन्त्री खनालले असन्तुष्टि जनाउनुभएको हो । किसानको पक्षमा कृषि अनुसन्धान परिषदले कामै नगरेपछि त्यसको विकल्पमा आफूले किसान आवास परियोजना कार्यक्रम पनि सुरु गर्न लागिएको घोषणा गनुृभयो । सो परियोजनाले किसानका लागि आवश्यक आवाससहित प्रशिक्षणलगायतका कार्यक्रम सञ्चालन गर्ने उहाँको भनाई छ ।
सोमबारबाट काठमाडौंमा सुरु भएको ‘एसियन कृषि सम्मेलन तथा प्रर्दशनी–२०१९’ को उद्घाटन गर्दै मन्त्री खनालले ६६ प्रतिशत कृषकहरु रहेको मुलुकमा उनीहरुको आवश्यक्तालाई सम्बोधन हुने गरी अध्ययन र अनुसन्धानको कामलाई कृषि अनुसन्धान परिषदले अघि नबढाएपछि सरकारले सो परियोजनामार्फत् किसानहरुलाई आवश्यक प्रशिक्षण समेत दिने व्यवस्था गर्नु परेको पनि स्पष्ट पार्नुभयो । कार्यक्रममा बोल्दै कृषि, सहकारी तथा प्राकृतिक स्रोत समितिकी सभापति पूर्णकुमारी सुवेदीले युवाहरुलाई आकर्षित गर्नेगरी कृषि क्षेत्रको विकासमा लाग्न सरकारलाई सचेत गराए ।