राप्ती स्वास्थ्य विज्ञान प्रतिष्ठानका पाँच सरकारी डाक्टर काममा फर्किए

१० भाद्र २०७६, दाङ ।  राप्ती स्वास्थ्य विज्ञान प्रतिष्ठानको नियममा काम गर्ने प्रतिवद्धता जनाएर पाँच जना सरकारी चिकित्सकहरु काममा फर्किएका छन् । आन्दोलनमा रहेका पाँच जना चिकित्सकले आफूले दिएको राजीनामा फिर्ता लिई काममा फर्किएको प्रतिष्ठानका रजिष्टार रामप्रसाद प्याकुरेलले बताउनुभयो ।
काममा फर्किने चिकित्सकहरुमा छाला रोग डाक्टर जेम महर्जन, सर्जन डाक्टर ईश्वरी भुसाल, एनाथेसिया डा राजन शाक्य, ईमरजेन्सी वार्डमा कार्यरत डाक्टर अमृत लाम्गादे, सामुदायिक सेवामा कार्यरत डाक्टर बर्षा मानन्धर छन । प्रतिष्ठानमा सरकारी चिकित्सक र प्रतिष्ठानका चिकित्सक गरी दुईथरि चिकित्सकहरु कार्यरत रहेका छन् । जसले गर्दा प्रतिष्ठानमा जिम्मेवारी समस्या उत्पन्न भएको प्रतिष्ठानले वताउँदै आएको छ । प्रतिष्ठानको मातहतका सवै कर्मचारीहरु बिहान ८ बजेदेखि वेलुका ५ बजेसम्म काम गर्नुपर्ने हुन्छ । दुईथरीका डाक्टरहरु प्रतिष्ठानले राख्दा नै गञ्जागोल भएको रजिष्टार प्याकुरेलको तर्क छ ।