उयत्यकामा निषेधाज्ञा थप, राति ८ बजेपछि गाडी चलाउन प्रतिबन्ध

काठमाडौं, २६ साउन । कोरोनाभाइरसको संक्रमण नियन्त्रणका लागि काठमाडौं उपत्यकामा जारी निषेधाज्ञा थप गरिएको छ। बिहीबारबाट लागू हुने गरी थपिएको निषेधाज्ञामा राति ८ बजेपछि निजी तथा सार्वजनिक सवारी साधन चलाउने नपाइने भएको छ। आज बसेको काठमाडौं, ललितपुर र भक्तपुरका प्रमुख जिल्ला अधिकारीको बैठकले निषेधाज्ञा थप्ने निर्णय गरेको काठमाडौंका प्रमुख जिल्ला अधिकारी कालीप्रसाद पराजुलीले जनाउनुभएको छ । कोरोना संक्रमणदर नघटेकाले निषेधाज्ञा थप्ने निर्णय गरिएको उहाँको भनाइ छ। २८ साउनदेखि लागू हुने गरी ८ भदौसम्म निषेधाज्ञा थपिएको हो। यो अवधिमा यातायातका साधन सञ्चालनमा भने केही कडाइ गरिएको छ। यसअघि निजी तथा सार्वजनिक सवारी साधन सञ्चालनमा कुनै रोक लगाइएको थिएन। कोरोना बढ्न थालेपछि काठमाडौंमा उपत्यकामा १६ वैशाखदेखि निषेधाज्ञा लागू गरिएको हो। फेरि कोरोना संक्रमण बढ्न थालेपछि निषेधाज्ञामा थप कडाइ गर्न थालिएको हो।