कात्तिक १गतेदेखि बाग्मतीमा नयाँ भाडा लागू हुने

हेटौंडा, २१ असोज । बागमती प्रदेश सरकारले प्रदेशभित्र चल्ने सार्वजनिक यातायातको भाडादर कात्तिक १ गतेदेखि लागू हुने गरी समायोजन गरेको छ। प्रदेशका भौतिक पूर्वाधार विकासमन्त्री केशव पाण्डेले सरकारले प्रदेशमा चल्ने सार्वजनिक यातायातको भाडादर समायोजन गरिएको जानकारी दिनु भयो । उहाँका अनुसार काठमाडौँ उपत्यकाभित्र चल्ने सवारीसाधनको भाडा किलोमिटरको आधारमा र उपत्यकाबाहिरका १० जिल्लामा २३ प्रतिशतको दरले भाडा समायोजन भएको छ। मन्त्री पाण्डेले उपत्यकामा पहिले ८ प्रकारमा वर्गीकरण गरेर भाडा समायोजन गर्ने गरिएकोमा हाल ५ प्रकारमा विभाजन गरेर भाडा समायोजन गरिएको जानकारी दिनुभयो । उहाँका अनुसार उपत्यकाभित्र चल्ने सवारीको हकमा ० देखि ५ किलोमिटरको १८ रुपैयाँ र २० किलोमिटर माथि ३५ रुपैयाँदेखि माथिका दरले भाडादर समायोजन भएको छ। सरकारका प्रवक्तासमेत रहनुभएका पाण्डेले उपत्यकाबाहिरका जिल्लामा भने २३ प्रतिशतको दरले भाडा समायोजन गरिएको जानकारी दिनुभयो । यसअघि हिजो बुधबार सार्वजनिक यातायात व्यवसायीले प्रदेशको भौतिक पूर्वाधार विकास मन्त्रालयअगाडि धर्ना दिएका थिए। धर्ना दिएपछि मुख्यमन्त्री कार्यालयको अनुमतिमा भौतिक पूर्वाधार मन्त्रालयले भाडा समायोजन गरेको मन्त्री पाण्डेको भनाइ रहेको छ।