युक्रेनमा पहिलो युद्ध–अपराध मुद्दा प्रारम्भ

काठमाडौं, ३१ बैशाख ।
रुसले आफूमाथि गत २४ फ्रेब्रुअरीमा आक्रमण शुरु गरेयता युक्रेनले पहिलो पटक युद्ध अपराध मुद्दा सुरु गरेको छ । एक निहत्था सर्वसाधारणको हत्या गरेको अभियोगमा २१ वर्षिय सैनिकलाई अदालतमा उभ्याइएको छ । भादिम सिसिमारिन नामक ती सैनिक किभमा सुरु भएको प्रारम्भिक सुनुवाइको दौरान अदालतमा उपस्थित भएका हुन् । यदि, अभियोग प्रमाणित भएको खण्डमा उनलाई आजन्म कारवास सजाय हुनेछ । युक्रेनले आफूले रुसी फौजबाट भएका हजारौं सम्भावित युद्ध अपराध फेला पारेको दाबी गरेको छ । रुसले आक्रमणको दौरान सर्वसाधारणलाई लक्षित नगरेको बताएको छ भने यस मुद्दाबारे कुनै टिप्पणी गरेको छैन ।
तर, युक्रेनी सूत्रले उनी कसरी पक्राउ परे वा उनी विरुद्धको प्रमाणको स्वरुपबारे केही बताएको छैन । रुसी नियन्त्रणमा रहेका विभिन्न युक्रेनी क्षेत्रमा सयौं सर्वसाधारणका शव फेला परिसकेको छ ।