खेतीयोग्य जग्गा १५ आनाभन्दा कम काट्न नपाइने

काठमाडौं, २५ जेठ ।
व्यापारिक प्रयोजनका लागि जथाभावी रूपमा गरिँदै आएको खेतीयोग्य जग्गा कित्ताकाटमा कडाइ गरिएको छ । अब काठमाडौं उपत्यकामा कृषि क्षेत्रका जग्गा १५.७३ आनाभन्दा कम क्षेत्रफल हुने गरी कित्ताकाट गर्न पाइने छैन । यसैगरी, तराई र भित्री मधेसमा २१.२३ आनाभन्दा कम र उपत्यका, तराई र भित्री मधेसबाहेकका स्थानमा ३१.४५ आनाभन्दा कम क्षेत्रफल हुने गरी कित्ताकाट गर्न पाइने छैन । भू–उपयोग ऐन आएको ३ वर्षपछि सरकारले गत जेठ ९ मा भू–उपयोग नियमावली स्वीकृत गरेको थियो । उक्त नियमावली सोमबार राजपत्रमा प्रकाशन भएसँगै मनलाग्दी रूपमा हुँदै आएको जमिन खण्डीकरणमा अंकुश लाग्ने भएको हो । आवासीय क्षेत्रको हकमा भने देशैभर ४.०९ आनाभन्दा कम क्षेत्रफल हुने गरी कित्ताकाट गर्न नपाइने नियमावलीमा उल्लेख छ ।