कुनै पनि बहानामा र परिस्थितिमा कुनै पनि देशको भौगोलिक अखण्डतामाथि हुने बल प्रयोगको नेपाल विरोध गर्दछ : परराष्ट्र सचिव

काठमाडौं, ११ असोज ।
परराष्ट्र सचिव भरतराज पौड्यालले कुनै पनि बहानामा र परिस्थितिमा कुनै पनि देशको भौगोलिक अखण्डतामाथि हुने बल प्रयोगको नेपालले विरोध गर्ने जनाउनुभएको छ । संयुक्त राष्ट्रसंघको ७७ औं महासभालाई अमेरिकाको न्यूयोर्कमा सम्बोधन गर्दै युक्रेन, अफगानिस्तान, म्यानमार र लिबिया विषयमा नेपालको स्पष्ट धारणा राख्ने क्रममा उहाँले नेपालले कुनै पनि बहाना र परिस्थितिमा कुनै पनि देशको भौगोलिक अखण्डता, राजनीतिक स्वतन्त्रता र सार्वभौमसत्ताविरुद्ध कुनै पनि खतरा वा बल प्रयोगको विरोध गर्ने बताउनुभएको हो । युक्रेन युद्धमा भएको सर्वसाधारणको मृत्यु र पीडाप्रति उहाँले गहिरो चिन्ता समेत व्यक्त गर्दै शत्रुता र हिंसाको तत्काल अन्त्यको लागि आह्वान समेत गर्नुभयो । यस्तै उहाँले सबै सम्बन्धित पक्षहरूलाई अधिकतम संयम अपनाउन र वार्ताको बाटोमा फर्कन आग्रह पनि गर्नुभयो । अफगानिस्तान अनिश्चितता र हिंसाको शिखरमा रहेको उनले बताए । अफगान जनताले गरिबी र मानवीय पीडाको सामना गरिरहेको समेत उहाँले जनाउनुभयो । सम्बोधनका क्रममा परराष्ट्र सचिव पौड्यालले म्यानमारका सबै पक्षहरूलाई प्रजातान्त्रिक प्रक्रियाको पुनस्र्थापनाका लागि मार्ग प्रशस्त गर्दै आफ्ना प्रतिनिधिहरू चयन गर्ने जनताको इच्छालाई सम्मान गर्न पनि आग्रह गर्नुभयो । यस्तै लिबिया, सिरिया र यमनका जनताले लामो समयदेखि कठिनाइ र पीडाको सामना गरिरहेकोमा उहाँले चिन्ता व्यक्त गर्नुभयो ।