1 मिनेट 
काठमाडौं,१४ जेठ।
गृहमन्त्री रमेश लेखकले राजीनामा नदिने भएका छन् । बुधबार प्रधानमन्त्रीको सरकारी निवास बालुवाटारमा बसेको सत्तारुढ दल एमाले र कांग्रेसका शीर्ष नेताहरूको बैठकले गृहमन्त्री लेखकले राजीनामा दिनु नपर्ने निष्कर्ष निकालेको हो ।
बैठकले भिजिट भिसा प्रकरणबारे उठेका प्रश्नबारे गृहमन्त्री लेखकले प्रतिनिधिसभा बैठकमा जवाफ दिने पनि निष्कर्ष निकालेको एमालेका प्रमुख सचेतक महेश बर्तौलाले जानकारी दिए । बर्तौलाका अनुसार, बुधबारकै प्रतिनिधिसभा बैठकमा गृहमन्त्री लेखकले सदन र बाहिर आफूमाथि उठेका विषयमा जवाफ दिने र त्यसका लागि सभामुख देवराज घिमिरेसँग समय माग्नेछन् ।
प्रमुख प्रतिपक्षी दल नेकपा माओवादी केन्द्र, राष्ट्रिय स्वतन्त्र पार्टी, राप्रपालगायत विपक्षी दलहरूले भने गृहमन्त्री लेखकको राजीनामा माग्दै आएका छन् । माओवादी केन्द्रसहित प्रतिपक्षी दलहरूले गृहमन्त्रीको राजीनामा र छानबिन गर्न उच्चस्तरीय छानबिन समितिको माग गर्न यसअघि मंगलबार प्रतिनिधिसभा बैठकमा अवरोध गरेका थिए ।
विपक्षी दलहरूको अवरोधका कारण प्रतिनिधिसभा बैठक सूचना टाँस गरेर बुधबार बिहान ११ बजे बस्ने गरी स्थगित गरिएको थियो । बैठकमा प्रधानमन्त्री केपी शर्मा ओली, कांग्रेस सभापति शेरबहादुर देउवा, उपसभापति पूर्णबहादुर खड्का, गृहमन्त्री लेखक र एमालेका प्रमुख सचेतक बर्तौला सहभागी थिए ।
