जलविद्युत् आयोजनाको पीपीए एउटै दरमा गर्न माग

२१ भाद्र २०७६ ।  रुग्ण जलविद्युत् आयोजनाले साना र ठूला सबै खाले आयोजनाको पीपीए दर एउटै कायम गर्न माग गरेको छ । आयोजनाको पछिल्लो अवस्थाबारे शुक्रबार ऊर्जा मन्त्रालयमा गरिएको छलफलमा निजी क्षेत्रका ८३ वटा साना जलविद्युत् आयोजना वित्तीय जोखिममा परेको भन्दै आयोजनालाई जोगाउन सरकारसँग आग्रह गरिएको हो ।
सञ्चालन खर्चसमेत धान्न नसक्ने अवस्थामा रहेका २५ वटा जलविद्युत् आयोजना यतिबेला बन्द हुने अवस्थामा पुगेका छन । कुल ८४ मेगावाट क्षमता भएका यी आयोजनामध्ये केही आयोजना बैंकले लिलामी गर्ने अवस्थामा पुगेका छन् । अब निजी क्षेत्रका आयोजनालाई सरकारी क्षेत्रबाट नै नियमन गर्नुपर्ने महसुस भएको रुग्ण जलविद्युत् आयोजना समन्वय समितिले जनाएको छ । हाल ८३ वटा आयोजना निजी क्षेत्रको प्रवद्र्धनमा सञ्चालनमा रहेका छन् । यी आयोजनामा ५४ अर्ब लगानी गरेको निजी क्षेत्रको अहिले लगानी नै धरासायी हुने अवस्थामा रहेको आयोजनाका प्रवद्र्धकले जनाएका छन् ।