युवालाई स्वदेशमै रोजगारी र अवसरको सिर्जना हुनुपर्ने राष्ट्रपति भण्डारीको भनाई

काठमाडौँ, २९ साउन ।
राष्ट्रपति विद्यादेवी भण्डारीले दिगो विकासका लक्ष्य हाँसिल गर्नका लागि स्वदेशमा नै रोजगारीका अवसर सिर्जना गर्नुपर्नेमा जोड दिनुभएको छ । अन्तर्राष्ट्रिय युवा दिवसका अवसरमा राष्ट्रिय युवा परिषद्ले आज आयोजना गरेको कार्यक्रममा भिडियो सन्देशमार्फत राष्ट्रपति भण्डारीले युवालाई उत्पादनसँग जोड्नु आवश्यक रहेको बताउनुभयो । युवा शक्ति देशको शक्ति भएको भन्दै राष्ट्रनिर्माणमा युवाको भूमिका महत्वपूर्ण हुने बताउनुभयो । राष्ट्रपति भण्डारीले युवा जनशक्ति बेरोजगार हुँदा मुलुकको समग्र आर्थिक र सामाजिक प्रणाली नै अवरुद्ध हुने बताउनुभयो । युवा विदेश पलायन हुँदा दिगो अर्थतन्त्रको विकासका लागि समेत प्रतिकूलता सिर्जना हुने उहाँको भनाइ छ । सीपको अभावमा वैदेशिक रोजगारीमा जाँदा न्यून आम्दानी हुनुका साथै स्वास्थ्य सुरक्षा र नोकरी पनि असुरक्षित हुने भएकाले त्यसतर्फ ध्यान दिन सुझाउनुभयो । एजेन्सि ।