फिफा विश्वकप छनोट अन्तर्गतको खेलमा जर्मनीको फराकिलो जित

काठमाडौँ,२१ भदौ ।
फिफा विश्वकप छनोट अन्तर्गत जर्मनीले फराकिलो जित निकालेको छ । हिजो राति भएको खेलमा जर्मनीले अर्मेनियालाई ६–० गोल अन्तरले पराजित गरेको हो ।
जर्मनीको घरेलु मैदानमा भएको खेलमा सर्जी जिनाब्रीले दुई गोल गरे । खेलको छैटौं मिनेटमा जिनाब्रीले गोलगर्दा जर्मनीले एक गोलको अग्रता बनाएको थियो ।
लगतै १५ औं मिनेटमा जिनाब्रीले व्यक्तिगत दोस्रो गोल गर्दै टिमलाई २–० को अग्रता दिलाए । खेलको ३५ औं मिनेटमा रिउसले गोल गर्दा जर्मनी ३–० को अवस्थामा पुग्यो । त्यस्तै, ४५ औं मिनेटमा वेर्नेरले गोल गर्दा जर्मनीले ४–० को अग्रता बनायो । खेलको ५२ औं मिनेटमा जोनासले गोल गर्दा टिमको अग्रता ५–० को बन्यो साथै इन्जुरी समयमा करिमले गोल गर्दै जर्मनीलाई ६–० को शानदार जित दिलाए । जितसँगै जर्मनीले ५ खेलमा १२ अंक जोड्दै समूह जे को शीर्ष स्थानमा उक्लिएको छ । एजेन्सी ।